BJZQ zeınetaqy aktıvterin ınvestısıalyq basqarý boıynsha sholýda eseptelgen ınvestısıalyq kiris boıynsha shyǵyndardy túsindirdi.

Qordyń málimetinshe, 2025 jylǵy qańtarda eseptelgen ınvestısıalyq kiris mınýs 284,86 mıllıard teńge bolǵan.

BJZQ málimetinshe, bul teris kórsetkish shetel valútalary baǵamynyń qubylmalylyǵy men ol ınvestısıalaǵan qarjy quraldarynyń naryqtyq qunynyń ózgerýinen paıda bolǵan.

"Negizgi sebepteri – teńgeniń AQSH dollaryna qatysty 525,11-den 518,14 teńgege deıin nyǵaıýynan bolǵan valútalyq qaıta baǵalaý, sondaı-aq Qazaqstan Respýblıkasy Qarjy mınıstrliginiń memlekettik baǵaly qaǵazdarynyń (MBQ) naryqtyq qunynyń, olardyń kiristiliginiń ortasha eseppen 40 bazıstik pýnktke ósýi aıasynda tómendeýi. Sonymen qatar, sheteldik naryqtarda satyp alynǵan aktıvterdiń de naryqtyq quny azaıdy", – delingen habarlamada.

Qańtarda naryqtaǵy qubylmalylyq AQSH prezıdenti Tramptyń tarıfter engizý qaýpi men eńbek naryǵynyń turaqtylyǵy aıasynda baıqaldy.

Sonymen qatar, BJZQ zeınetaqy aktıvteriniń sońǵy 12 aıdaǵy salymshylar (alýshylar) shottaryna bólingen kiristiligi 15,66 paıyz, al osy kezeńdegi ınflásıa 8,90 paıyz bolǵan.

"2025 jyldyń qańtar aıynda BJZQ zeınetaqy aktıvteriniń salymshylar (alýshylar) shottaryna bólingen kiristiligi (-)1,25 paıyz boldy", – delingen habarlamada.

Jalpy, Ulttyq banktiń senimgerlik basqarýyndaǵy BJZQ zeınetaqy aktıvteri 22,28 trıllıon teńge bolǵan. Portfeldiń negizgi úlesin Qarjy mınıstrliginiń memlekettik baǵaly qaǵazdary alady. Olardyń qańtar aıyndaǵy úlesi 41,40 paıyz bolady.