28 aqpanda prokýratýranyń úılestirýimen Almaty qalasynyń UQKD qyzmetkerleri «Qazaqtelekom» AQ jáne «Ksell» AQ-men birlesip, frod-qońyraýlardy uıymdastyrǵan kúdiktini ustady.

 Tekserý barysynda eki SIM-boks anyqtaldy, olardyń bireýinde nómirlerdi aýystyrý jáne alaıaqtyq qońyraýlar úshin paıdalanylǵan SIM-kartalarǵa arnalǵan 32 sloty, sondaı-aq túrli operatorlardyń kóptegen SIM-kartasy bar.

Buǵan deıin 2024 jylǵy 1 qarashada Almaty qalasynyń prokýratýrasy, «Qazaqtelekom» AQ men «Kcell» AQ arasynda frod-qońyraýlarǵa qarsy kúres salasynda yntymaqtastyq týraly memorandýmǵa qol qoıylǵan bolatyn. 2024 jyly birlesken kúshtiń arqasynda Almatyda 14 SIM-boks mashınasynyń qyzmeti joıyldy.

Qylmystyq toptardyń elimizdiń basqa óńirlerine belsendi qonys aýdarýyna baılanysty Bas prokýratýrasynyń Jedel-izdestirý, qarsy barlaý qyzmeti men jasyryn tergeý áreketteriniń zańdylyǵyn qadaǵalaý departamentiniń járdemdesýimen Ulttyq qaýipsizdik komıtetin jumysqa qosý týraly sheshim qabyldandy.

-  Almaty qalasy prokýratýrasynyń úılestirýimen vedomstvoaralyq toptyń jumysy barysynda, sonyń ishinde Almaty qalasy boıynsha UQKD Kıberqaýipsizdik aqparat basqarmasynyń jedel súıemeldeýimen elimizdiń 8 óńirinde 202 abonenttik nómir anyqtaldy. 9 SIM-boks qurylǵysy tárkilengen 8 mekenjaı anyqtaldy, 8 adam ustaldy, onyń ishinde Reseı Federasıasynyń 6 azamaty. Sondaı-aq túrli uıaly operatorlardyń 8 407 SIM-kartasy tárkilendi, - delingen habarlamada.

Internet alaıaqtyqpen kúres jumysy jalǵasyp jatyr.