Bul týraly Qasym-Jomart Toqaev Ulttyq quryltaıdaǵy sóılegen sózinde aıtty, dep habarlaıdy  Aqorda.

«Bıyl Abaı Qunanbaıulynyń týǵanyna 180 jyl tolady. Men osydan bes jyl buryn uly oıshyldyń týǵanyna 175 jyl tolýyna oraı Semeıde abaıtanýshy ǵalymdarmen kezdestim, sol kezde Abaı ınstıtýtyn qurý týraly usynys aıttym. Búginde bul bastama sıfrlyq platforma formatynda iske asyryldy, ıaǵnı bizdiń dıasporalar men basqa da sheteldikterge qazaq tilin úıretý quraly retinde jumys istep tur. Endi osy jobany tolyqqandy mádenı-aǵartý mekemelerine aınaldyrý qajet. Bul qurylym Konfýsıı, Gete, Servantes ınstıtýttary sıaqty jumys isteýi kerek», dedi prezıdent.

Memleket basshysy Abaı ınstıtýty shetelderde de ashylýy kerektigin aıtty.

«Abaı ınstıtýty negizgi seriktes elderdiń bárinde tól mádenıetimizdi nasıhattaıtyn ortalyq bolýǵa tıis. Birqatar elde, mysaly, Qytaı, Túrkıa, Mońǵolıa jáne basqa da memleketterde osyndaı ortalyqtar ashylatyn boldy. Syrtqy ister mınıstrligi men «Otandastar» qoryna Mádenıet jáne aqparat mınıstrligimen birlesip, shetelde osyndaı ortalyqtar ashý máselesi boıynsha tıisti jumysty jalǵastyrýdy tapsyramyn.

Halyqaralyq «Qazaq tili» qoǵamy belsene aınalysýda. Bul uıymnyń bastamalaryn biz tutas qoǵam bolyp ári qaraı qoldaýymyz kerek.

Mádenıet degenimiz – jaı ǵana ǵımarattar men mekemeler emes. Bul – ulttyq sana-sezimdi jahandyq aýqymda nyǵaıta túsetin myqty tuǵyr», dedi prezıdent.