Bas prokýratýranyń málimetinshe, laýazymdy tulǵalar talan-tarajǵa salǵan qarajat 2021 jyly Kókshetaý qalasynda eski aeroporttan bastap Qan ortalyǵyna deıin "Naberejnaıa" jaǵajaıyn salýǵa bólingen. 

Kúdiktilerdiń búdjet qarajatyn asa iri kólemde jymqyrý, talan-tarajǵa salýy qylmystyq kodekstiń 189-baby 4-bóligi boıynsha saralandy. Bul bap boıynsha múlkin tárkileýmen qosa 12 jylǵa deıin bas bostandyǵynan aıyrý jazasy kózdelgen.

“Barlyq kúdiktiler sot sanksıasymen kúzetpen ustaýǵa alyndy. Tergeý barysynda qylmystyq jolmen alynǵan múlik – Astana qalasynda 95 mıllıon teńgege baǵalanǵan komersıalyq jyljymaıtyn múlik tabyldy”, – delingen habarlamada.

Sondaı-aq "Naberejnaıa" jobasy boıynsha jumystyń bir bóligi Atbasardaǵy basqa nysannan jymqyrylǵan aqshaǵa jasalǵany belgili boldy. Sondyqtan bir kúdiktiniń áreketi qylmystyq jolmen alynǵan aqshany jáne ózge múlikti zańdastyrý (jylystatý), ıaǵnı qylmystyq kodeksiniń 218-baby 3-bóligi boıynsha qosymsha saralandy. Bul úshin múlkin tárkileýmen qosa 10 jylǵa deıin bas bostandyǵynan aıyrý jazasy qarastyrylǵan.