Prezıdent Qasym-Jomart Toqaev elimizdiń saıası-ıdeologıalyq kelbeti týraly aıtty.
"Sońǵy jyldary elimizdiń saıası-ıdeologıalyq kelbeti túbegeıli ózgerdi. Ekonomıkada júıeli reformalar qolǵa alyndy. Eń bastysy, qoǵamnyń sana-sezimi ózgere bastady. Keıingi jyldary saıası oqıǵalarǵa baǵa berý turǵysynan halqymyzdyń kózqarasy da jańa sıpatqa ıe boldy. Alǵa qaraı adymdap qadam basty deýge bolady. Biz zamanaýı jáne aldyńǵy qatarly qoǵamǵa aınaldyq. Munyń bári bizdegi qoǵamdyq kelisim úlgisine de tyń talaptar qoıady. Keshe ǵana tıimdi sanalǵan ádis-tásilder búgin jaramsyz bolýy múmkin", - delingen habarlamada.
Prezıdent bizge eskiliktiń izine qaıta túspeý úshin barlyq jetistikterimiz ben sátsizdikterimizdi tarazy basyna qoıyp, zerdeleý qajet ekenin aıtty.
"Eń áýeli, Assambleıa qyzmetiniń máni men mazmunyn qaıta qaraǵan jón. Meniń túsinigimde Assambleıa memlekettiń etnosaralyq saladaǵy barlyq jumysyna baǵyt beretin strategıalyq shtabqa aınalýy kerek.
Atalǵan naqty mindetterdi júzege asyrý ultaralyq qarym-qatynas sıaqty mańyzdy ári názik salada atqarylyp jatqan aýqymdy isterdi jańa mazmunmen tolyqtyratynyna senimdimin. Ultaralyq kelisim men turaqtylyqty nyǵaıtý – memlekettik saıasattyń basty baǵyttarynyń biri jáne solaı bolyp qala beredi. Qazaqstanda kelisim, tózimdilik, dostyq uǵymdary qur uran emes, azamattardyń kúndelikti ómir saltyna aınalǵan qundylyq. Aýqymdy qaqtyǵystar, saýda soǵystary, adam ómiriniń qunsyzdanýy kezeńinde beıbitshiliktiń qadiri erekshe arta tústi. Óıtkeni, bul – damýdyń basty kepili.
Barlyǵymyz qal-qadirimizshe beıbitshilikti saqtaýǵa atsalysamyz. Men buǵan deıin barlyq ákimderge turaqty túrde etnosaralyq, ultaralyq kelisim máselesine arnalǵan jınalys ótkizip turýdy tapsyrdym. Ortalyq jáne jergilikti atqarýshy organdar osy mańyzdy salany jiti nazarda ustaýy kerek. Etnosaralyq jáne konfesıaaralyq qatynas máselesin eshqashan saıasat nemese túrli arandatý quralyna aınaldyrýǵa bolmaıdy. Bul – memlekettiń de, búkil qoǵamnyń da buljymas qaǵıdasy".
