ALMATY. QazAqparat - Búgin Almatyda «Nur Otan» partıasynyń qalalyq Máslıhattaǵy depýtattyq fraksıasynyń qala búdjetin ońtaılandyrý máselesi boıynsha ótkizgen otyrysynda birqatar iri jobalardy qarjylandyrýdy ýaqytsha toqtatý usynyldy.
«Nur Otan» partıasynyń qalalyq fılıalynda ótken jıynǵa Almaty ákimi Baýyrjan Baıbek qatysty.
Otyrys barysynda birinshi kezekte qalanyń batys jaǵyna jańa avtovokzal salý úshin jeke jer telimderin memleket paıdasyna satyp alýǵa bólingen qarjyny 1,6 mlrd. teńgege, Naýryzbaı aýdanynda ákimshilik ǵımarat salýǵa bólingen qarjyny 2,7 mlrd. teńgege jáne «Almatyınvest-2015» úshinshi halyqaralyq forýmǵa bólingen qarjyny 105 mln. teńgege qysqartý usynyldy.
Sonymen qatar, Máslıhat depýtaty, «Nur Otan» partıasy qalalyq fılıalynyń baqylaý-revızıalyq komısıasynyń múshesi Sergeı Kozlov «Kókjaılaý» taý-shańǵy shıpajaıyn salý jobasyn ázirge toqtatýdy usyndy. Onyń aıtýynsha, 2017 jylǵy qysqy Ýnıversıadany ótkizýge qazirgi salynyp jatqan nysandar da jetkilikti.
Taǵy bir Máslıhat depýtaty Artýr Kotenev qalada bes jerústi ótkelderin salýǵa arnalǵan jobany toqtatyp, oǵan bólingen 950 mln. teńgeni áleýmettik nysandar salýǵa baǵyttaýdy usyndy. Onyń aıtýynsha, qalada 2008 jyldan kúni búginge deıin 70-ten astam jerasty jáne jerústi ótkelderi salynǵan. Bul jaıaý júrginshilerdiń joldan ótip turýlaryna oń áser etti. Ázirge osylar da jetkilikti.
«Degenmen máseleler jetip artylady. Qazirgi salynǵan jerústi kópirleriniń kóbisinde tazalyq saqtalmaıdy, qoqysqa toly. Al múgedekterge arnalǵan jedelsatylar tipti istemeıdi. Onyń ústine bul ótkelderdiń baǵasy tym qymbat. Osyǵan baılanysty jaý júrginshilerge arnalǵan jańa kópirler salý jobasyn ýaqytsha toqtata turýdy usynamyn», - dedi A. Kotenev.
Al Máslıhat depýtaty Murat Ádilhanov óz kezeginde «Almaty ıpodromy» sport oıyn-saýyq keshenin qala menshigine satyp alý sharasyn ýaqytsha toqtatý kerektigin alǵa tartty.
«Bul jobanyń tıimdiligi áli de tolyq eseptelgen joq. Árıne, ıpodrom qalaǵa kerek. Biraq, bul jaǵdaıda baǵa saıasaty tolyq naqtylanbaǵan. Bul óte qymbat baǵa. Sondyqtan ıpodromdy satyp alýǵa bólingen 4 mlrd. 278 mln. teńgeni áleýmettik mańyzy bar basqa jobalarǵa jumsaǵan jón», - dedi ol.
Baıandamalardy tyńdap bolǵan soń sóz alǵan qala basshysy Baýyrjan Baıbek búgingi otyrysqa qatysýshylardy qolǵa alynyp jatqan ońtaılandyrý sharalaryna túsinistikpen qaraýǵa shaqyrdy.
«Búgin óte mańyzdy máseleler kóterildi. Almatyda óte kóp jobalar júzege asyrylyp jatyr. Biraq, eń bastysy áleýmettik mindettemelerdi oryndaýymyz qajet. Áleýmettik az qamtylǵan turǵyndarǵa qoldaý kórsetý - biz úshin basymdyqty baǵyttardyń biri. Sondyqtan Elbasynyń tıimsiz shyǵyndardy ońtaılandyrý jónindegi tapsyrmasyn basshylyqqa ala otyryp, iri jobalardy barynsha ońtaılandyryp, únemdelgen qarajatty áleýmettik baǵyttarǵa jumsaǵanymyz durys bolady», - dedi B. Baıbek.
Budan keıin otyrysta aıtylǵan usynystar daýysqa salynyp, barlyǵy biraýyzdan qabyldandy.
Almaty qalasynyń 2015 jylǵa arnalǵan búdjetin ońtaılandyrý boıynsha únemdelgen somanyń jalpy somasy erteń Máslıhattyń kezekti sesıasynda naqtylanatyn bolady.
Derekkóz: Qazaqparat
