QYZYLORDA. QazAqparat - Búgin Shıeli aýdanynyń ortalyǵy kógildir otynǵa qosyldy. Turǵyndardyń qýanyshymen Qyzylorda oblysynyń ákimi Qyrymbek Kósherbaev jáne «QazTransGaz» AQ bas dırektorynyń birinshi orynbasary Serik Estaı ortaqtasty. Bul týraly oblystyq ákimdiktiń baspasóz qyzmeti habarlady.
Aıta keteıik, Qyzylorda oblysy ákimdigi men "QazTransGaz" AQ arasynda byltyr jasalǵan memorandýmǵa sáıkes, Jańaqorǵan, Shıeli, Qazaly jáne Aral aýdandary men Baıqońyr qalasyn gazdandyrýǵa qajetti qarajat bólingen. Al, oblystyń qalǵan aýdandary kelesi jyly gazben qamtylatyn bolady. Ol jumystarǵa qajetti 16 mlrd. teńgeni Eýropalyq Qaıta Qurý jáne Damý Banki ınvestısıalaıtyn bolady.
- Elbasynyń tapsyrmasymen gazdandyrý jumystary óńirde qarqyndy júrgizilýde. Qazirgi tańda gazdy aýdan ortalyqtaryna jetkizetin qubyrlary salynyp bitti. Ótken aptada jańaqorǵandyqtar kógildir otynǵa qosylsa, endi mine Shıeli aýdany qýanyshqa kenelip otyr. Keler jyly qalǵan úsh aýdanda gazdandyrý jumysy bastalady. Sol kezde oblystyń 83 paıyz halyq turatyn aýmaq gazdandyrylady. Aıta keteıin, áleýmettik qoldaýdy qajet etetin otbasylarǵa kómek kórsetiletin bolady, - dedi oblys ákimi Q.Kósherbaev.
- Úılerge gaz qosyp, turǵyndarǵa jylý men qýanysh syılaı otyryp, «QazTransGaz» AQ halyqtyq kompanıa ekenin taǵy bir dáleldedi. Oǵan mysal, jyl saıyn Ulttyq operator respýblıka boıynsha 35 myńnan astam abonenttiń úıine gaz kirgizip otyr. Júzege asyrylyp jatqan ınvestısıalyq joba aıasynda bir ǵana Qyzylorda oblysynda bıyl 1250 km gaz qubyry salyndy. «QazTransGaz» áleýmettik jaýapkershilikti joǵary qoıatyn kompanıa. İstep otyrǵan jumysymyz túgeldeı halyqtyń turmysyn jaqsartýǵa elimizdiń ál-aýqatyn arttyrýǵa baǵyttalǵan, - dedi «QazTransGaz» AQ bas dırektorynyń birinshi orynbasary Serik Estaı.
Búgin úıine alǵash bolyp kógildir otyndy kirgizgendirdiń biri Aıtýarovtar otbasy. Olardyń qýanyshynda shek joq. Talaı jylǵy armandary oryndalǵanyna rıza.
- Jasyratyny joq bastapqyda gaz keledi degende kúmánmen qaraǵanbyz. Biraq Elbasynyń qoldaý kórsetken jobasy júzege asty. Bizdiń qýanyshymyzda shek joq. Óıtkeni, endi ot jaǵyp, kúl shyǵarmaımyz, - deıdi Shıeli aýdanynyń turǵyny Ardaq Aıtýarov.
Aıta ketý kerek, kelesi aptada Qazaly aýdanyn gazdandyrý bastalady, odan keıingi kezekte - Aral aýdany.
Derekkóz.QazAqparat
