ORAL. QazAqparat - Batys Qazaqstan oblysynda tıisti sharalardyń nátıjesinde jyl basynan beri 270 mekeme-kásiporynda 2339 qyzmetkerge 260 mln. teńge eńbekaqy bereshegi óteldi. Bul týraly oblys ákiminiń orynbasary Baqtıar Mákenniń tóraǵalyǵymen ótken BQO ákimdigi janyndaǵy daǵdarysqa qarsy shtab otyrysynda málim etildi.
Oblystyq eńbek ınspeksıasy basqarmasynyń basshysy Janat Asantaevtyń aıtýynsha, jalaqyny ýaqtyly tólemeýge qatysty anyqtalǵan 70 zańbuzýshylyq deregi boıynda jumys berýshilerge 6,3 mln. teńge kóleminde aıyppul salyndy. Eńbekaqy bereshegin óteýge qatysty buryn berilgen uıǵarymdardyń oryndalmaýyna baılanysty jospardan tys qaıtadan 14 tekseris ótkizilip, sonyń nátıjesinde sot sheshimderimen 10 jumys berýshige 2,3 mln. teńge aıyppul salyndy. Ótken qyrkúıek aıynda «SPMK-123» JSHS-nyń 58 qyzmetkerge 4,7 mln. teńge jalaqydan bereshek bolyp otyrǵany tirkelgen. Sonymen qatar eńbek ınspeksıasy 6 kásiporynnyń 243 qyzmetkerge 37,236 mln. teńge qaryzdar ekendigin anyqtady. Qazirgi tańda osy kásiporyndar boıynsha jalaqy bereshegin óteý jumystary júrgizilýde.
Otyrysta oblystyq ádilet departamentiniń basshysy Ásıa Muhıtovanyń baıan etkenindeı, bıyl sot oryndaýshylaryna jumysshy-qyzmetkerlerge qaryz kólemi 170 mln. astam teńgeni quraıtyn 144 qujat tússe, sonyń 126-sy (130 mln. teńge) oryndalǵan. Sondaı-aq jumysshylar esebine 86,8 mln. teńge óndirilgen. Qazir óndiriste 13 kásiporynǵa qatysty 14 qujat (37 mln. teńge) qalsa, sonyń 9 mln. teńgesi «Kroýn Batys» JSHS-yna tıesili.
Oblystyq memlekettik kirister departamenti basshysynyń orynbasary Nurbolat Abdýlovtyń sózine qaraǵanda, bıylǵy 1 qazandaǵy málimet boıynsha óńirdegi jumys berýshilerdiń mindetti zeınetaqy jarnalary boıynsha bereshegi 55,9 mln. teńgeni qurap, birinshi jartyjyldyqtaǵy kórsetkishten 2,1 mln. teńgege kemigen. Al áleýmettik tólemder boıynsha qaryz 3,4 mln. teńgege kóbeıip, 22,6 mln. teńgege jetip otyr. 365 jumys berýshi zeınetaqy zańdylyǵyn buzǵany úshin, 359 jumys berýshi áleýmettik tólemder bereshegi boıynsha ákimshilik jaýapkershilikke tartyldy.
Oblysta 150 kásiporyn bankrottyq, oǵan qosa 12 kásiporyn ońaltý úrdisterinen ótkizilýde. 150 bankrottyq kásiporynnyń 9-ynyń jáne ońaltýdan ótip jatqan bir kásiporynnyń jalaqy bereshegi 198,295 mln. teńgeni quraıdy. 9 bankrottyq kásiporynnyń tórteýiniń 29,4 mln. astam eńbekaqy qaryzy tolyqtaı ótelgen.
Jıyn qorytyndysynda qazirgideı kezeńde jumys oryndarynyń qysqartylýyna, sondaı-aq jalaqy bereshegi, zeınetaqy jáne áleýmettik tólemder qaryzynyń qordalanýyna jol bermeý qajettiligi aıtylyp, departamen-basqarma basshylaryna tıisti tapsyrmalar berildi.
Derekkóz: QazAqparat
