ALMATY. QazAqparat - Búgin Almatyda Qazaqstan Respýblıkasy Ádilet mınıstrliginiń Sot saraptamasy ortalyǵynyń uıymdastyrýymen  «Shyǵys-Batys: sot saraptamasyndaǵy áriptestik. Sot saraptamasynyń teorıasy men tájirıbesiniń ózekti máseleleri» atty halyqaralyq ǵylymı-tájirıbelik konferensıasy bastaldy.
Oǵan QR Ádilet mınıstrliginiń ókilderi, QR Parlamentiniń depýtattary, Qazaqstannyń sot saraptamasy mekemeleriniń basshylary men jetekshi sarapshylary jáne Armenıa, Ázerbaıjan, Belorýs, Vetnam, Qyrǵyzstan, Qytaı, Reseı, Tájikstan, Túrkıa, Ýkraına jáne basqa da elderden  kelgen ǵalymdar, barlyǵy 150-den astam adam qatysýda.

«Búgingi konferensıanyń maqsaty - ár eldiń sarapshylyq mekemelerinde kezdesetin aǵymdaǵy máselelerdi jan-jaqty talqylaý jáne sheshý, aımaqtyq jáne ultaralyq ózara is-áreketterdiń damýyn qamtamasyz etý, sondaı-aq sot-saraptama qyzmetiniń keleshektegi damý jolyn aıqyndaý. Zańnyń ústemdigin qamtamasyz etýde sot saraptamasy mańyzdy ról atqaratyny sózsiz. Biz zertteýler júrgizemiz jáne sarapshylyq tujyrymdar jasaımyz. Biraq búgingi tańda bul jetkiliksiz. Zaman talabyna saı, saraptama jasaýdyń jańa túrlerin, jańa ádistemelerin ázirleýimiz qajet. Sondyqtan da búgin osy máselelerdi talqylaý úshin halyqaralyq sot saraptamasy mekemeleriniń mamandaryn shaqyryp otyrmyz», - dedi «QazAqparat» tilshisine bergen suhbatynda QR Ádilet mınıstrliginiń Sot saraptamasy ortalyǵynyń dırktory Isıdor Borchıshvılı.

Sondaı-aq, konferensıa barysynda kórshi elderdiń sot-saraptama qyzmetiniń quqyqtyq jáne uıymdastyrýshylyq aspektileri boıynsha tájirıbeleri men josparlaryn tyńǵylyqty zerdeleý josparlanyp otyr.

Aıta ketelik, atalmysh konferensıa birqatar memleketterdiń sot sarapshylarynyń ustanymdaryn biriktirýge baǵyttalǵan. Bul is-shara 10 jyldan asa ýaqyttan beri sot saraptamasy salasyndaǵy is-qımyldar strategıasy men úılestirý mehanızmderin talqylaýǵa jáne ázirleýge, aqparattarmen almasýǵa jáne ózara jemisti yntymaqtasýǵa arnalǵan ámbebap alańǵa aınaldy.

Derekkóz: QazAqparat