26 qazanda Qaraǵandy oblystyq sotynda «Ahmetov isi» boıynsha kýágerlerden sotta jaýap alý odan ári jalǵasty. Qaraǵandy qalasynyń ındýstrıaldyq parkindegi ınfraqurylymdyq nysandardyń qurylysyn salý kezinde búdjet qarajatyn urlaý týraly epızod boıynsha «Memlekettik ekspertıza» respýblıkalyq memlekettik kásipornynyń sarapshysy Tatána Týmanova sóz sóıledi. Ol óz sózinde ındýstrıaldyq parktegi ınfraqurylymdyq nysandar «Memekspertızanyń» tujyrymynsyz salynǵanyn málimdedi.
«Indýstrıaldyq parktegi sharýashylyq-turmystyq sýaǵarlar stansıasynyń qurylysy barysynda negizinen, jobanyń tehnologıalyq bóligine qatysty túzetýler engizildi. Aldymen aǵyn sýlardy tazalaýǵa arnalǵan «USB» tehnologıasy jumysqa qabyldanǵan edi. Bul jobany «Sáýlet» JSHS-niń mamandary júzege asyrdy. Sodan keıin jańa jobalaýshylar paıda boldy. Sóıtip, sharýashylyq-turmystyq sýaǵarlardy tazalaý tehnologıasy kúrt ózgerdi. Jańa jobalaýshylar munysyn chehtyń «USB» tehnologıasyna qaraǵanda arzanǵa túsetindigimen túsindirdi. Al qondyrǵynyń ózi chehtardyń qondyrǵysyna uqsas degendi aıtty. Sóıtip, biz osy tehnologıany qarastyra bastadyq»,- dep túsindirdi istiń mánisin T. Týmanova.
Onyń aıtýynsha, tehnologıany qarastyrý barysynda «Memekspertızaǵa» quzyrly organdardyń birinen bireý qońyraý shalyp, saraptamaǵa jartylaı salynyp bitken nysannyń materıaldary usynylǵanyn habarlaǵan. Sol kezde menen: «Siz bul nysandardyń kópshilik bóligi salynyp bitip, paıdalanýǵa berilgenin bilesiz be? Atqarylǵan jumystardyń aktisi bar ma?» dep surady. Biraq meniń bul isten esh habarym joq edi. Sol sebepten men atalǵan nysannyń qurylysy is júzinde aıaqtalǵany týraly eshteńe bilmeıtinimdi aıtyp, túsinik hat jazdym. Odan keıin bizge taǵy da qujattar kelip tústi, onda qaıtadan túzetýler engizilipti. Kóp uzamaı qarjy polısıasy qyzmetkerleri kelip, barlyq qujattardy alyp qoıdy,- dep áńgimeledi T. Týmanova.
Atalǵan nysannyń jobalyq-smetalyq qujattamasyn qaraý barysynda «Memekspertıza» RMK-nyń sarapshylary tarapynan kóptegen saýaldardyń týyndaǵanyn osy mekemeniń qyzmetkeri Gúlnar Artekova da rastady. Ol sot otyrysynda kez-kelgen nysannyń qurylysynda tehnologıany aýystyratyn jaǵdaıda joba memlekettik komısıanyń qaıta tekserýinen ótýge tıistigin málimdedi. Sarapshy sharýashylyq-turmystyq sýaǵarlar stansıasynyń jobasynda eki tehnologıanyń salystyrmaly sıpattamasy bolmaǵanyn ashyp aıtty. «Joba alǵash ret 2013 jyly túzetýge jiberildi. Biz osyǵan oraı, eki túrli salystyrmaly sıpattamanyń bolýyn surap, hat jazdyq. Sebebi túzetýde eki nusqanyń biriniń salystyrmaly túrde artyqshylyǵy kórsetiledi. Biraq ondaı sıpattama aqyry bolmady. Bizge kóbinese ekonomıkalyq bólikke qatysty qujattardy jiberdi»,- dedi G. Artekova sotta.
Vıdeonyń siltemesi : https://yadi.sk/mail/?hash=fTNaB1vTClppDfDg0TXT2P9%2BprXZfJEVJWMeHqUtqLQ%3D
Ámına BÁKİR.
https://yadi.sk/mail/?hash=fTNaB1vTClppDfDg0TXT2P9%2BprXZfJEVJWMeHqUtqLQ%3D
