Almaty oblysynda «Qymyzmuryndyq – 2026» mádenı-kópshilik jáne sporttyq sharasy ótti. Saltanatty sharada QR Prezıdentiniń keńesshisi Málik Otarbaev Memleket basshysynyń quttyqtaýyn jetkizdi. Al Almaty oblysynyń ákimi Marat Sultanǵazıev dúbirli dýmannyń mańyzyna toqtalyp, qonaqtarǵa izgi tilegin arnady. Sondaı-aq meımandar «Qymyzmuryndyq» aıasynda uıymdastyrylǵan kórmeni aralap kórip, ulttyq oıynnan synǵa túsken sportshylardyń ónerin tamashalady.
Málik Nurjanuly Memleket basshysy Qasym-Jomart Toqaevtyń ystyq sálemin jetkize otyryp, Prezıdentimizdiń ulttyq qundylyqtardy ulyqtap, ata dástúrimizdi dáripteýge arnalǵan osyndaı taǵylymdy is-sharalarǵa erekshe mán beretinin aıtty. Sonymen qatar Kegen aýdanynda ótip jatqan «Qymyzmuryndyq» merekesi urpaqtar sabaqtastyǵyn nyǵaıta túsetinine senim bildirdi.
Aımaq basshysy óz sózinde halyqtyń qoldaýymen qolǵa alynǵan ıgi bastamalardyń ǵumyry qashanda uzaq bolatynyn tilge tıek etti. Sondaı-aq Almaty oblysy búginde tabıǵı baılyǵy men tarıhı murasyn ushtastyra otyryp, týrızmdi damytýdyń jańa kezeńine qadam basqanyn jetkizdi. Aımaq basshysynyń aıtýynsha, ótken jyly óńirimizge 2,5 mıllıonnan astam týrıs kelgen. Bul Almaty oblysynyń tabıǵı áleýeti men tarıhı-mádenı murasyna degen qyzyǵýshylyqtyń turaqty artyp kele jatqanyn kórsetedi.
Aıta keteıik, «Qymyzmuryndyq» merekesi Qarqara jaılaýynda bıyl 5-ret ótkizilip, qazaqtyń kóregen abyzy Álmerek Janshyqulynyń 368 jyldyǵymen tuspa-tus keldi. Osyǵan oraı abyz baba rýhyna Quran baǵyshtalyp, as berildi. Sondaı-aq ulttyq sport túrlerinen respýblıkalyq jarystar uıymdastyrylyp, sportshylardyń shymyrlyǵy men tózimdiligi synǵa tústi.
