Almaty oblysynda halyqtyń ulttyq rýhyn oıatyp, darhan dalany dýmanǵa bólegen «Qymyzmuryndyq – 2026» festıvali óz máresine jetti. Bıyl bul merekege elimizdiń túkpir-túkpiri men alys-jaqyn shet elderden 35 myńǵa jýyq qonaq keldi. Festıválde ulttyq sport túrlerinen túrli saıystar ótip, mereke qorytyndysynda júzden júırik, myńnan tulpar shyqqandar marapattaldy.

Mereke barysynda Myńjylqynyń tósin dúbirletken myń jylqynyń kórinisi jınalǵan kópshiliktiń nazaryn ózine erekshe aýdardy. Jer tarpyǵan jylqylar dúbirin estigende, eleń etpegen el qalmady. 

Dúıim jurttyń jiger, namysyn janyp ótken báıgeniń de orny erekshe boldy. Bıyl bul jarysta eki júzge jýyq tańdaýly shabandoz baq synady. 
Júlde qory da qomaqty boldy. Alaman báıgeniń jeńimpazy Jetour X70 FL Prestige avtokóliginiń ıegeri atandy. Ekinshi orynǵa – 2,5 mıllıon teńge, úshinshi orynǵa 1 mıllıon teńge berildi. 

«Túıe palýan» jarysy da jankúıerler nazaryndaǵy basty básekelerdiń birine aınaldy. Bilekti balýandar kúsh synasatyn saıystyń jeńimpazdary da júldeli syılyqtardan qalys qalǵan joq.

«Qoshqar kóterý» jarysyn da kópshilik qyzyǵa tamashalady. Syrttaı qaraǵanda qarapaıym kóringenimen, bul saıys zor kúsh-qýatty, tózimdilikti, qoldyń qarymyn jáne durys ádis-tásildi talap etedi. Dástúr boıynsha qoshqardy eń kóp kótergen sportshy ony óz júldesi retinde aldy.

«Alyptar saıysynda» qatysýshylar naıza laqtyrý, temir shybyq ıý, aýyr tasty kóterip júrý, 100 kelilik bórenemen jattyǵý jáne 500 kelilik arbany súıreý sekildi qıyn akrobatıkalyq tásilderdi kórsetti. Saıys jeńimpazy 1,5 mıllıon teńge kólemindegi bas júldeni ıelense, ózge júldegerlerge de qomaqty aqshalaı syıaqylar tabystaldy.

Negizgi jarystardan bólek festıválde qol kúresi, arqan tartý, toǵyzqumalaq, shahmat, qoı qyrqý jáne kóshpeli ómirdiń ajyramas bóligine aınalǵan ózge de ulttyq saıystar ótkizildi.

Qarqara jaılaýynda uıymdastyrylǵan bul mereke ulttyq sporttyń mereıin ústem etip, qazaq halqynyń rýhanı qundylyqtaryn dáriptegen mańyzdy mádenı shara retinde este qaldy.