Almaty ákimdigi Respýblıka alańyndaǵy "Táýelsizdik tańy" eskertkishiniń nege qorshaýǵa alynǵanyn túsindirdi. Bul týraly «Qamshy» portaly QazAqparatqa silteme jasap habarlaıdy.

Qalalyq Mádenıet basqarmasynyń basshysynyń mindetin oryndaýshy Erbolat Áýezov QazAqparat agenttiginiń arnaıy saýalyna jaýap beripti. 

«Eskertkish ornatylǵaly beri mádenı nysanǵa arnaıy jóndeý jumystary júrgizilmegen. Saldarynan postamenttiń granıt taqtaıshalary synyp, bir-birinen ajyraǵandyqtan, aǵymdaǵy jóndeý jumystary júrgizilip jatyr. Jumys 25 qarashada aıaqtalady», - dedi Erbolat Áýezov.
Aıta ketý kerek, Jeltoqsan men Sátbaev kósheleriniń qıylysyndaǵy «Táýelsizdik tańy» eskertkishi 2006 jyly ornatyldy. Jumystyń avtory - Qazaqstan dızaınerler odaǵynyń tóraǵasy Tımýr Súleımenov. 
Atalǵan eskertkish qazannyń aıynyń sońynda qorshaýǵa alynǵan bolatyn. Qorshaý ishinde eki aptadaı jumys júrgizilgen joq. Qazir eskertkishti qalpyna keltirý jumystary bastaldy.