Qazaqstanda týberkýlezben syrqattaný 6 jyldyń ishinde 1,6 esege tómendedi. Bul týraly QR Densaýlyq saqtaý jáne áleýmettik damý vıse-mınıstri Alekseı Soı Astana qalasynda ótken «Kóshi-qon jáne týberkýlez: Ortalyq Azıa elderinde týberkýlezdi transshekaralyq baqylaý» atty aımaqtyq kezdesýde málimdedi. Bul týraly «Qamshy» portaly QazAqparatqa silteme jasap habarlaıdy.  

 «Salamatty Qazaqstan» memlekettik baǵdarlamasyn júzege asyrý aıasynda halyqtyń týberkýlezben syrqattanýyn tómendetýde aıtarlyqtaı jetistikterge qol jetkizdik. Elimizde atalǵan aýrýmen syrqattaný 6 jyldyń ishinde 1,6 esege, onyń saldarynan týyndaıtyn ólim-jitim 2,6 esege tómendedi», - dedi A. Soı.

Vıse-mınıstr ártúrli saraptamalyq baǵalaýlar boıynsha Qazaqstan jyl saıyn 300-500 myńnan 1 mln-ǵa deıin eńbek mıgranttaryn qabyldaıtynyn, olardyń 15 paıyzy juqpaly aýrýlarmen, onyń ishinde týberkýlez jáne AITV-men aýyratynyn jetkizdi. Otandaryna aýrýy anyqtalǵan 10 adamnyń kóp degende bireýi ǵana qaıtarylady. Ózge mıgranttar elimizdiń densaýlyq saqtaý júıesine óz aýyrtpashylyǵyn júktep otyr. Shamamen mıgranttar aǵynynyń úshten bir bóligi 2 iri qalanyń enshisinde: Almaty jáne Astana.

Respýblıkada týberkýlezben syrqattanǵan mıgranttarǵa týberkýlezge qarsy kómek sharalary DDSU Eýropalyq Aımaǵyndaǵy (2012 j. Volfhezedegi bátýalastyq málimdemesi) týberkýlezdi transshekaralyq baqylaý men emdeýdiń eń tómengi paketine sáıkes júzege asyrylady. Bul - mıgranttar arasyndaǵy týberkýlez ben kóptegen ári keń kólemdi dárilerge turaqtylyǵy bar týberkýlezdi dıagnostıkalaýdyń sapasy men qoljetimdiligin arttyrý bolyp tabylady. Sharalar JITS, týberkýlez, bezgek aýrýlarymen kúres boıynsha Jahandyq qor grantynyń sheńberinde densaýlyq saqtaý salasynda bilim berý jáne qaıyrymdylyq sharalaryn ótkizýmen aınalysatyn halyqaralyq úkimettik emes «Project HOPE» (Proekt HOÝP) gýmanıtarlyq uıymymen birlese otyryp júrgiziledi.

Qazaqstanda 2014-2020 jyldarǵa arnalǵan týberkýlezben kúres boıynsha keshendik jospar júzege asyrylýda. Atalǵan josparǵa mıgranttar arasynda týberkýlezdi emdeý men aldyn alý boıynsha qyzmetterdi jetildirý, joǵarǵy deńgeıde kezdesýlerdi uıymdastyrý arqyly aımaqtyq dıalogqa bastamashylyq etý sharalary kiredi.

Kezdesý aıasynda eki kúnniń ishinde jumys toptarynda jáne plenarlyq otyrystarda jýyq aradaǵy 12 aıǵa jumys quraly bolatyn Áreketter jospary (Jol kartasy) talqylanatyn bolady.

Esterińizge sala keteıik, Qazaqstanda «Project HOPE» óziniń týberkýlezben kúres baǵdarlamasyn 1993 jyldan bastaǵan bolatyn. Sol ýaqyttan beri týberkýlezdi baqylaý boıynsha ártúrli jobalardy engizýge qatysyp keledi. Sharaǵa Qazaqstan, Qyrǵyzstan, Tájikstan, Reseı jáne Ózbekstan elderiniń jetekshi mamandary, densaýlyq saqtaý jáne kóshi-qon máselelerimen aınalysatyn mınıstrlik pen vedomstvolardyń, Dúnıejúzilik densaýlyq saqtaý uıymynyń, kóshi-qon halyqaralyq uıymy jáne ulttyq týberkýlezge qarsy ortalyqtarynyń, sonymen qatar ÚEU ókilderi qatysty.