Qazaqstanda «Halyq markasy-2016» jobasy bastaldy. Bul týraly búgin QR Prezıdenti janyndaǵy Ortalyq komýnıkasıalar qyzmetindegi brıfıńte «Halyq markasy» jobasynyń jetekshisi Rımma Tájibaeva málim etti, - dep habarlaıdy «Qamshy» portaly QazAqparatqa silteme jasap.

«Bizdiń maqsatymyz álemdik arenada Qazaqstanda jasalǵan  ónimderdi kórsetý bolatyn. Sondyqtan «Halyq markasy-2016» baıqaýyn  Brazılıada ótetin jazǵy Olımpıada oıyndaryna oraılastyrmaqpyz.  Bul konkýrsqa sol Olımpıadada óner kórsetetin barlyq sportshylarymyz belsene qatysyp, barlyǵy da óz óńirlerinde shyǵarylatyn  taýarlardy jarnamalaıtyn bolady. Al «Halyq markasy» konkýrsynyń jeńimpazdaryn Rıo-2016 Olımpıadasy kezinde ashylatyn Qazaqstannyń qonaqjaı úıinde marapattaımyz», - dedi ol.

Onyń atap ótýinshe, baıqaýǵa qatysýshylardyń ótinishi boıynsha konkýrs merziminen erte bastalyp otyr.

«Búginnen bastap «Halyq markasy-2016» jobasy bastalady. Ol aqpan aıynyń sońyna deıin jalǵasady.  Birinshi kezeńde barlyq óńirden azyq-túlik óndirýshilerin, fermerlerin osy baıqaýǵa qatysýǵa shaqyramyz. Al naýryz aıynan mamyr aıynyń ortasyna deıin halyqtyq daýys berý sharasy júrgiziledi.  Osylaısha baıqaýǵa qatysatyn 300 kompanıanyń ishinen úzdik 50-60 kásiporyn iriktep alynyp, olardyń attary mamyr aıynda belgili boldy. Odan keıin tamyz aıyna deıin jeńimpaz kompanıalarǵa Rıo Olımpıadasynda ótetin úlken kórmege daıyndalýǵa ýaqyt beriledi», - dedi R.Tájibaeva.