Shymkenttik polıseıler jas qyzdy ólimnen aman alyp qaldy. Bul týraly «Qamshy» portaly TVK-ǵa silteme jasap dep habarlaıdy.

Oqıǵa 20 qarasha kúni túnde tirkeldi. Jas qyz Rysqulov kóshesinde ornalasqan kópirden sekirip ketpekshi bolǵan. Ótip bara jatqan adamdar qyzdyń bul áreketi týraly polısıaǵa habar bergen. Oqıǵa bolǵan jerge kelgen tártip saqshylary qyzdy áreń qutqaryp qaldy.

Eske sala keteıik, Almatyda 8 qarasha kúni polıseıler dál osyndaı oqıǵanyń aldyn alǵan bolatyn.  Qalalyq İİD málimetinshe, Áýezov aýdany boıynsha "Býran-11" jol-patrýldik polısıasynyń ekıpajy 8 qarasha kúni habarlama alǵan. "Bir mınýttan keıin biz Qabdolov pen Saıyn kósheleriniń qıylysyna kelip jettik. Joldyń arǵy betindegi qyz ózin óltirýge sheshim qabyldaǵan edi. Biz jaqyndaýǵa múmkindik alý úshin onymen alystan áńgimelestik", - dedi Almaty İİD jol-patrýldik polısıa polkiniń ınspektory Ádil Ádilhanov.

Áńgimelesý barysynda polıseıler qyzdyń mundaı qadamǵa otbasyndaǵy keleńsizdikterden barǵaly otyrǵanyn anyqtaǵan. "Bizdiń bilýimizshe, onyń emshektegi balasy bar. Bul bizdiń áńgimeni uzartýymyzǵa sebep boldy. Biz oǵan balasy týraly oılaýyn usyndyq. Ol birneshe ýaqyt boıy tómen qarap turdy da, sekirip ketpekshi boldy. Sol kezde men júgirip baryp ony ustap qaldym. Osylaısha qyz qutqaryldy", - dedi quqyq qorǵaý organdarynyń qyzmkerleri.