Búgin tańerteń Almatyda ústi-ústine úsh márte jer silkindi. Osyǵan baılanysty Almaty qalasynyń Tótenshe jaǵdaılar jónindegi departamenti túsinikteme berip, turǵyndardyń alańdaýyna esh negiz joq dep málimdedi.

Bul týraly «Qamshy» portaly QazAqparatqa silteme jasap  habarlaıdy.

«Bizge kelip túsken saraptamalyq aqparatqa sáıkes, Almaty qalasynda qala turǵyndary úshin qaýip týdyratyndaı eshqandaı iri jer silkinisteri, zilzala bolmaıdy. Búgingi oqıǵalarǵa qatysty jer asty dúmpýi sezilgen joq. Qaýipti jer silkinisi bolýy múmkin degen aqparat kelip túsken jaǵdaıda turǵyndarǵa aldyn ala SMS-habarlamalar jiberiletin bolady», - dep atap ótti Almaty qalalyq TJD baspasóz hatshysy Sandýǵash Baımuhambetova.

Esterińizge sala keteıik, «QR BǴM ǴK STÁE» MM seısmıkalyq stansasy jelisiniń habarlaýynsha, 21 qarasha kúni úsh ret jer silkinisin tirkeldi.

Alǵashqysynyń oshaǵy Almaty qalasynan batysqa qaraı 473 shaqyrym jerde Qyrǵyzstan aýmaǵynda ornalasqan. Jer silkinisiniń energetıkalyq klasy - 11,1, magnıtýdasy - 5,1. Tereńdigi - 5 shaqyrym.

Ekinshisi jergilikti ýaqyt boıynsha saǵat 06.46-da jer silkinisi tirkeldi. Zilzala oshaǵy Qyrǵyzstan aýmaǵynda, Almaty qalasynan batysqa qaraı 467 shaqyrym qashyqtyqta ornalasqan. Jer silkinisiniń energetıkalyq klasy - 8.5. Magnıtýdasy - MPV 3.6. Tereńdigi - 5 shaqyrym. 
Úshinshisi Almaty ýaqyty boıynsha tańǵy saǵat 08.35-te tirkeldi. Onyń oshaǵy Almaty qalasynan ońtústik-batysqa qaraı 486 shaqyrym jerde Qyrǵyzstan aýmaǵynda ornalasqan. Jer silkinisiniń energetıkalyq klasy - 9.9, magnıtýdasy - 4,1. Tereńdigi - 0-5 shaqyrym.