Amerıkalyq er adam 2001 jylǵy 11 qyrkúıekte bolǵan terrorlyq shabýyldar kezinde, sodan keıin taıaýda Parıjde bolǵan teraktiler kezinde aman qalǵan, - dep habarlaıdy «Qamshy» portaly Tengrinews.kz-ke silteme jasap.

32 jastaǵy er adam óziniń adam sengisiz oqıǵasy jaıly "Bataklan" teatrynan shyqqannan keıin tilshilerge aıtyp bergen. 

11 qyrkúıektegi terrorlyq aktiler kezinde ózin Metú dep tanystyrǵan er adam egiz ǵımarattyń biriniń kireberisinde turypty. Ol osy ǵımaratqa jumys babymen kelgen eken. Jarylys bolǵan sátte ol qaýipti aımaqtan shyǵyp úlgeredi. "Men Menhettenniń boıymen júgirdim. Biraq "Bataklanda" bolǵan oqıǵa myń ese qorqynyshty boldy", - deıdi ol.

Metú teatr ishinde konsert kórgenin aıtyp berdi, sol ýaqytta teatrǵa lańkester kirip kelip, adamdardy ata bastaǵan. Amerıkalyq munda da kireberiste turypty, aıaǵyna oq tıipti. "Atys birer sátke toqtaǵan kezde men santımetrlep eńbektep shyǵa berdim. Sodan keıin áreń degende esikti ashyp, syrtqa shyqqannan keıin es-túsimdi bilmeı qulap tústim", - dedi amerıkalyq.

Eske sala keteıik, 14 qarashaǵa qaraǵan túni Parıjde belgisiz bireýler eń aldymen qaladaǵy meıramhanalardyń birine shabýyl jasady. Sonymen qatar, Fransıa-Germanıa machy ótip jatqan "Stad de Frans" stadıonynyń mańynan da jarylystyń dybysy estildi. Lańkester "Bataklan" teatrynda adamdardy kepilge aldy. Sońǵy derek boıynsha, 129 adam qaza taýyp, 350 adam jaraqattandy. Jeti lańkestiń kózi joıyldy.