Ál-Farabı atyndaǵy Qazaq ulttyq ýnıversıtetiniń «100 kitap» baǵdarlamasy aıasynda «Ultynyń umytylmas tulǵasy – Sapar Baıjanovtyń shyǵarmashylyǵy» atty respýblıkalyq ǵylymı-tájirıbelik konferensıa ótti. Konferensıaǵa jazýshy-jýrnalıstiń jary Kúlásh Beısenbıeva men balasy Erlan Baıjanov, zamandastary men shákirtteri qatysty. İs-shara barysynda Sapar Baıjanovtyń ómiri men shyǵarmashylyǵyna arnalǵan «Qazaq ýnıversıteti» baspasynan «Ónegeli ómir» serıasymen jaryq kórgen kitaptyń tusaýy kesildi. Bul týraly «Qamshy» portaly habarlaıdy.
«Ómirdiń de ómiri bar. Túrlishe ómir súrýge bolady. Bireýler negizinen alǵanda ózi úshin ómir súredi. Qaryn toq, qaıǵy joq. Esh qıynshylyq ta tarshylyq ta kórmeı, aýzynan aq maı aǵyp degendeı rahat tirlik keshedi. Sóıtip júrip dúnıeden ótedi. Ekinshi bir adamdar ózi úshin ómir keshpeıdi. Álgindeı qoshan tirlikti mise tutpaıdy. Jerim qaıtse kógerer, elimiz, urpaǵymyz qaıtse baqytty bolady degendeı úlken arman arqalap, sonyń jolynda ǵumyryn, ómirin sarp etedi. Qıyndyq, azapty da shegýi múmkin. Biraq, sol joldan aınymaıdy, talmaıdy. Qıynyna qınala júrip dúnıeden ótedi. Mundaı adamdar ómirde kóp bolmaıtyny da ras. Sanaýly ǵana birtýar sańlaqtardyń, eren erlerdiń enshisi bul», - dedi kezinde Sapar aǵa. Sondaı sanaýly azamattardyń biriSapekeńniń ózi edi.
Qazaq jýrnalısıkasynyń qara jorǵasy, qarymdy qalamger, bilgir ǵalym Sapar aǵanyń týǵanyna bıyl 85 jyl.
Sarbas Aqtaev, jýrnalıs-jazýshy:
- «Ónegeli ómir» serıasymen jaryq kórip kele jatqan kitaptar bizdiń qalamgerlerimizdiń, qaıratkerlerimizdiń, qoǵamnyń qalyptasýyna atsalysqan ardagerlerimizdiń tanylýyna óz septigin tıgizip jatyr. Jaqsy joba jalǵasyn tapsyn dep tilek bildiremiz. Sapekeń týraly «Ómirge ókpem joq meniń» degen atpen jaryqqa shyqqan birinshi kitaptyń redaktory boldym. Onyń halqyna sińirgen eńbegi týraly aıtylar áńgime áli de kóp. Al Sapardyń ómirge qaldyrǵan eń ozyq murasy onyń arystaı úsh uly jáne Nazym. Osy balalardyń búginde aýyz toltyryp aıtarlyqtaı azamat bolǵandary meni qatty qýantady. Eline eńbegi sińgen azamat bolsa, osy Sapekeńdeı-aq bolsyn.
Saýytbek Abdrahmanov, «Egemen Qazaqstan respýblıkalyq gazeti» AQ Prezıdenti:
- Kezinde bir ǵana fakúltet boldy.Túlekteriniń qaıda baratynyn Qazaqstan kompartıasynyń ortalyq komıteti sheshetin. Ol zań, fılosofıa nemese ekonomıka fakúltetteri emes-tin. Ol jýrnalısıka fakúlteti bolatyn. Osyndaı kezeńde jumys istegen adam óte jaýapty adam bolýy kerek edi. Sapekeń sol kezde Qazaqstannyń bas gazeti «Sosıalısik Qazaqstandy» (qazirgi «Egemen Qazaqstan») 10 jyl basqardy. Ol kisiniń jaqsy qasıetteri óte kóp bolatyn. Sapekeń adam tanı alatyn, qandaı jaǵdaı bolmasyn túsinistikpen qaraıtyn.
Jumabek Kenjalın, «Qazaq gazetteri» JSHS-nyń Bas dırektory:
- Adamdy alǵash kórgende-aq pikir qalyptasady. 1981 jyly men «Sosıalısik Qazaqstan» gazetine bardym. Sonda redaktordyń qabyldaýyna kirdim. Sapar aǵanyń kabınetine kirgen boıda «Kel, qalqam otyr», - dedi. Sonda júregimniń qaǵysy birden qalpyna tústi. Sol kezdegi kózqaras, sol kúlki ómir boıy meniń jadymda. Sapar aǵanyń jany jańashyldyqqa qumar edi. Qazaqstanda gazetterdi kompútermen terýdi eń alǵash Sapar aǵa «Halyq keńesi» gazetinde júrgende Marat Toqashbaev ekeýmizge tapsyrǵan. Ol kisi qazaq jýrnalısıkasyn qalaı damytsaq eken degen ustanymmen únemi izdenis ústinde júretin.
Qaırat Saq, L.N.Gýmılev atyndaǵy EUÝ jýrnalısıka jáne saıasattaný fakúltetiniń dekany:
- Búginde Sapar aǵanyń shyǵarmashylyǵyn zerttep júrgen sonyń ishinde dıplomdyq jumystar, dısertasıalar jazyp júrgen jastar barshylyq. Sapar aǵa týraly aldyńǵy býyn aǵalarymyzdan artyq aıta almaspyz. Biraq, Sapar aǵanyń muraǵat salasyndaǵy eńbegin aıtyp ótý kerek. Ol kisi qujattarǵa uqypty bolý kerek, sebebi qujatty qaıta jańǵyrtý múmkin emes deıtin.
Kúlásh BEISENBİQYZY, Sapar Baıjanovtyń jary, jazýshy-jýrnalıst:
- Ol kisi barynsha eńbekqor adam edi, únemi jaýapty qyzmette bolǵandyqtan qoly kóp tıe bermeıtin. Demalys kúni bastaǵan shyǵarmashylyq jumysynyń jalǵasyn kelesi demalysta bir-aq aıaqtaıtyn. Arada oılar úzilip qalsa da, óte qabiletti kisi, osylaı jeke shyǵarmashylyǵyn jalǵastyryp otyratyn.
Eger bir jigittiń jaqsy bir oıy bar maqalasyn oqysa, ol qaı jerdiń jigiti, ol kim, minez-qulqy qandaı degenge qaramaıdy. Ózindik oıy bar, qalamy júırik dep qamqorlyq jasaıtyn. Ústinen jastardy jınap jatyr degen aryzdar túsip jatqanyna qaramaı, on bes oblystan jazý stıli kóńilinen shyqqan jigitterdi redaksıaǵa shaqyrdy, qoldaý kórsetti.
Júzdegen maqala, jıyrmadan astam kitap, roman men pesa jazǵan S.Baıjanovtyń ómiri men shyǵarmashylyǵy, ol týraly jazylǵan estelikter men arnaýlar «Ónegeli ómir» serıasymen jaryq kórgen kitapqa arqaý boldy. Bes bólimnen turatyn kitapqa arnaıy muraǵat qujattary da engen.
Ýnıversıtet rektory, akademık Ǵalymqaıyr Mutanovtyń bastamasymen ótken jıyn sońynda Sapar Baıjanovtyń jary Kúlásh Beısenbıeva men balasy Erlan Baıjanovqa, Úmbetbaı Ýaıdınge, Mereke Kókenovke, Esenǵalı Raýshanovqa, Amanhan Álimulyna, Shómishbaı Sarıevke«ál-Farabı atyndaǵy QazUÝ-ge 80 jyl» mereıtoılyq tósbelgisi tabystaldy.
