Almatyda búgin ıpotekalyq nesıemen úı aldyq degen 30 shaqty boryshker Ulttyq bank aldynda narazylyq aksıasyn ótkizdi. Bul týraly «Qamshy» portaly Azattyqqa silteme jasap habarlaıdy.
Aqtóbeden kelgen boryshker, "Halyqqa baspanasyn qaldyraıyq" qozǵalysynyń múshesi Gúljamal Aıtmuhametovanyń Azattyqqa aıtýynsha, bankten ıpotekalyq nesıemen alǵan úılerdiń qaryzyn qaıta qarjylandyrý baǵdarlamasy aıaqtalmaıynsha boryshkerlerdi úılerinen kúshtep shyǵarmaýdy talap etedi.
- Problemalyq nesıelerdi qaıta qarjylandyrý baǵdarlamasy aıaqtalyp bolmaıynsha boryshkerlerdi úılerinen shyǵarýdy toqtatsyn. Boryshkerler baǵdarlama boıynsha ıpotekalyq nesıelerin qaıta qarjylandyrýǵa qujat tapsyryp qoıǵan. Soǵan qaramastan sot oryndaýshylar qaryzyn tólemegen boryshkerlerdi kúshtep úılerinen shyǵaryp jatyr. Ulttyq bank ekinshi deńgeıli bankterge sotqa qaryzdaryn óndirý jóninde talap-shaǵym berýdi toqtatsyn degen buıryq berýi tıis, biraq bermeı otyr, - dedi Aıtmuhametova.
Boryshkerleren kezdesýge shyqqan ulttyq banktiń tutynýshylar quqyǵyn qorǵaý departamentiniń dırektory Aleksandr Terentev bankterdiń baǵdarlama júrip jatqanda boryshkerlerdi úılerinen shyǵarýy zańsyz ekenin ǵana aıtyp, narazylardyń taraýyn surady.
Bıyl aqpanda prezıdent Nursultan Nazarbaev ulttyq bankke úkimetpen birlesip ıpotekalyq turǵyn úı boıynsha qaryzyn óteı almaı júrgenderdiń máselesin sheshýdi tapsyrǵan. Budan soń ulttyq bank problemalyq ıpotekalyq nesıelerdi qaıta qarjylandyrý úshin 130 mıllıard teńge qarjy bólgen. Ol qarjynyń jartysyna jýyǵy ekinshi deńgeıli bankterge aýdarylǵan. Qarashanyń basynda ulttyq bank 3 myń 500 problemalyq ıpotekalyq nesıe qaıta qarjylandyrylǵanyn habarlaǵan. 1 qarashaǵa deıin ıpotekalyq turǵyn úı qaryzdaryn qaıta qarjylandyrý baǵdarlamasyna qatysýǵa 11 myń ótinish túsken. Onyń 6 myńy boıynsha nesıeni qaıta qarjylandyrý týraly oń sheshim shyqqan.
