Qyrǵyzstan Syrtqy ister mınıstrligi Reseı Memlekettik dýmasynyń depýtaty, LDPR partıasynyń jetekshisi Vladımır Jırınovskııdiń pikirine jaýap retinde málimdeme ázirlep jatyr. Bul týraly Bishkekte parlamenttiń halyqaralyq ister jónindegi komıtetiniń otyrysynda vedomstvo basshysy Erlan Abdyldaev aıtty dep habarlaıdy "Interfaks-Qazaqstan". "Jırınovskıı jýyrda Ýkraınadaǵy ahýal boıynsha sóılegen sózinde Ortalyq Azıa elderiniń táýelsiz mártebesine qatysty kúmán keltirdi. Ol Reseı Ýkraınany ǵana emes, Ortalyq Azıa elderin de "óz judyryǵynda" ustaýy kerek dep málimdedi. Bir jarym jyl buryn ol bizdiń respýblıkaǵa qatysty málimdeme jasaǵan bolatyn. Biz tıisti nota joldap, Jırınovskııdi persona non grata dep jarıaladyq. Onyń sońǵy málimdemesiniń emosıalyq boıaýy bar. Biz sondaı deńgeıdegi memlekettik qaıratkerler óz málimdemelerine abaı bolýy kerek dep esepteımiz", - dedi Abdyldaev. Qyrǵyzstan depýtattary Jırınovskııdiń sózinen basqa da jaǵymsyz áserlerdi baıqap otyr. "Jırınovskııdiń pikiri ıntegrasıalyq prosesterdi iske asyrýǵa, atap aıtqanda, Eýrazıalyq ekonomıkalyq keńistik qurý men Qyrǵyzstannyń Keden odaǵyna enýine qaýip tóndiredi", - dedi óz kezeginde halyqaralyq ister jónindegi parlamenttik komıtettiń tóraǵasy Qanybek Imanalıev. Salalyq komıtet basshylyǵy Jırınovskııdiń "Reseıdiń ortaazıalyq federaldyq okrýgin qurý arqyly Ortalyq Azıa elderiniń qataryn shekteý" týraly usynysyna baılanysty resmı málimdeme jasaý kerek dep esepteıdi. Parlament depýtattary Qyrǵyzstan syrtqy saıasat vedomstvosyna Jırınovskııdiń pikirine qatysty aqparat alý úshin Reseıdiń Syrtqy ister mınıstrligine nota joldaýdy tapsyrdy. Aıta keteıik, reseılik saıasatkerdiń "Qyrǵyzstan Reseıge qaryz ornyna Ystyqkóldi berýi kerek" degen pikiri úshin resmı Bishkek ony persona non grata dep jarıalaǵan bolatyn.