Elbasy úkimet otyrysynda ekonomıkalyq jaǵynan tıimdi ári mol ónim beretin jylyjaı kólemin ulǵaıtý kerektigin atap ótken bolatyn. Shymkenttegi Zero Max Kz jylyjaı qurylymdaryn óndirý zaýyty dál osy tapsyrmany oryndaý úshin toqtaýsyz jumys istep jatyr, dep habarlady  24.kz.

Indýstrıalandyrý kartasy sheńberinde ashylǵan kásiporyn jylyna 376 gektar jerge jetetin jylyjaı qurylymdaryn shyǵarýǵa qaýqarly. Bolashaqta plenka men tamshylatyp sýarýǵa múmkindik beretin qondyrǵylardy da óndirmek.

Baqytjan Redjepov zaýyt ashylǵan kúnnen bastap eńbek etip keledi. Ol kásiporyndaǵy alyp qondyrǵyny basqarady. Ozyq tehnologıanyń tilin shetelge baryp oqyp, ıgerip keldi. Ózbekstannan ata jurtqa qonys aýdarǵan matematıka pániniń oqytýshysy júrek qalaýymen óndiriske aýysady. Qazir óz isin tolyq meńgergen.

 «Ólshemderdi bergennen keıin bul apparat avtomatty túrde ózi isteıdi. Bul jerde jalpaq túrinde kelgen lıstti kerekti domalaq ne tórt buryshty fıgýraǵa salyp, ony dánekerleıdi. Kereksiz shyǵyndardy qyrnap alyp, ony alúmını qabatpen syrlap, daıyn kúıde shyǵaramyz», - dedi operator: Baqytjan Radjepov.

Zaýyt jylyjaıdyń syrtqy qańqasymen birge 50-ge jýyq qosalqy bólshekterin shyǵarady. Shıkizat otandyq. Myryshtan jasalǵan temir buıymdary shirimeıdi.

Seh basshysy Orazbaı Qadyrovtyń aıtýynsha, montajdyń qosalqy bólsheginiń barlyǵy osy zaýyttan shyǵady. «Endi bizde plenka zaýytyn salamyz dep jatyrmyz, bıyl bastaımyz. Keıin tamshylatyp sýarý bólshekterin Ońtústik Koreıadan alyp jatyrmyz. Jaqynda zaýyt bitse, jylyjaıdyń barlyǵy ózimizden shyǵatyn bolady», - deıdi ol.

Kásiporyn jylyjaı qurylymdaryn óndirip qana qoımaı, ony tolyq qurastyryp, iske qosyp beredi. Kepildemesi taǵy bar. Buzylsa, ózderi jóndeıdi.

 «Qazirgi kezde jylyjaıǵa suranys kóbeıip jatyr. Qazirgi kúnge deıin 150 gektar jylyjaı ónimderin shyǵaryp, sol suranystarǵa salyp berdik. Tolyq qýatta jumys istep turǵan zaýytta jalpy 60-qa jýyq adam eńbek etedi. Olardyń deni - aýyl jastary», - dedi  jylyjaı qurylymdaryn óndirý zaýyty basshysynyń óndiris jónindegi orynbasary Álmahan Aıtmýhamedov.

Memleket qoldaýynyń arqasynda aıaqtan turǵan kásiporyn jumyla eńbek etkende ǵana kez kelgen qıyndyqty eńsere alatyndaryna senimdi.

Derekkóz:       24.kz.