Ońtústik Qazaqstan oblysy, Tólebı aýdany, Abaı aýylynda sáni men saltanaty jarasqan «Amanta» atyndaǵy jańa meshit ashyldy. Saltanatty sharaǵa Qazaqstan musylmandar dinı basqarmasynyń tóraǵasy, Bas múftı Erjan qajy Malǵajyuly, naıb múftı Serikbaı qajy Oraz, qoǵam qaıratkeri Asqar Qulybaev, Qazaqstan musylmandar dinı basqarmasynyń Ońtústik Qazaqstan oblysy boıynsha ókil ımamy Ahmetjan qajy Kerimbek jáne jergilikti jurtshylyq qatysty, dep habarlaıdy «Qamshy» portaly.

Saltanatty shara aldymen qasıetti Quran oqýmen bastaldy. Ony Astana qalasy «Áziret Sultan» meshitiniń bas ımamy – naıb múftı Serikbaı qajy Oraz oqyp, duǵa baǵyshtady.

Osydan keıin quttyqtaý sóz alǵan QMDB-nyń tóraǵasy, Bas múftı Erjan qajy Malǵajyuly jınalǵan musylman jamaǵatyn jańa meshittiń ashylýymen quttyqtady. «Meshit – eldiń birligi men yntymaǵyna, jastardyń durys tálim-tárbıe alatyn oshaǵyna aınalýy tıis», - dedi Bas múftı. Osydan keıin meshittiń kitaphanasyna qasıetti Kálám sharıfti syıǵa tartty.

Sondaı-aq, meshittiń ashylý saltanatyna elimizge tanymal ánshi-kompozıtor Eskendir Hasanǵalıev, aqyn Balǵynbek Imash, «Qońyr» toby syndy óner juldyzdary qatysyp, eldi jandy ánderimen tántti etti.

Jańa meshit osy aýyldyń týmasy, oblystyq máslıhattyń depýtaty Áset Qaıypbekovtiń demeýshiligimen salyndy. Meshit kıeli Qazyǵurt taýynyń eteginde, úlken joldyń boıynda ornalasqan. Ǵıbadat úıiniń syıymdylyǵy 400 adamǵa arnalǵan. Meshit búgingi zaman talabyna saı etip jasalǵan.