Qashaǵan ken ornynda munaı óndirý jumysyn qalpyna keltirýdiń naqty merzimi belgisiz, dep habarlaıdy Tengrinews.kz tilshisi "QazMunaıGaz" UK basqarma tóraǵasy Saýat Myńbaevqa silteme jasap. "Qashaǵan boıynsha jumys áli de belgisiz bolyp bolyp tur. Shyǵyndar bar. Onyń barlyǵy ótken jylǵy 1 qazannan beri aqtalmaı jatyr. Respýblıka úshin ol jaman emes (munaı-gaz qory saqtalady - avt.). Degenmen, QazMunaıGaz úshin onyń saldary bar. Oǵan qosa, sol jerde munaı óndirý jumysynyń qashan bastalatyny belgisiz bolyp tur", - dedi S.Myńbaev. Aıta keteıik, álemdegi iri ken oryndardyń biri - Qashaǵanda munaı-gazdy óndirý jumysy ótken jyly qyrkúıek aıynda bastalǵan bolatyn. Alaıda bir aptadan keıin ol jumys toqtatyldy. Sebebi gaz qubyrynda aqaý bary anyqtalǵan. Qazan aıynda munaı men gazdy óndirý jumysy qaıta bastaldy. Biraq eki apta ótken soń, onyń aldynda bolǵan sebepke baılanysty barlyq jumystar qaıtadan toqtatyldy. Osydan keıin qubyrdyń bólshekteri arnaıy zerthanaǵa jiberildi. Búginde North Caspian Operating Co kompanıasy Qashaǵan ken ornynyń operatory bolyp sanalady. Atalǵan jobaǵa QazMunaıGaz, Eni, ExxonMobil, Royal Dutch Shell, Total jáne Inpex qatysýda. Sondaı-aq, Qytaıdyń CNPC kompanıasy QazMunaıGazdan jobanyń 8,33 paıyzyn satyp alǵan. Geologıalyq zertteýlerge sáıkes, 40 jyldyń eń iri munaı-gaz keni - Qashaǵanda 4,8 mıllıard tonna munaı bar.