Pavlodar oblysyndaǵy ınternatta tárbılenýshi qyz óz-ózine qol jumsady, dep habarlaıdy Tengrinews.kz tilshisi. Jedel aqparat kózine sensek, Pavlodar oblysynyń Baıanaýyl aýylyndaǵy mektep ınternatynda 17 jasar Maǵjan Jumahan esimdi qyz bala darǵa asylyp qalǵan.

"Endi bul oqıǵaǵa baılanysty "Ózin-ózi óltirýge deıin jetkizgeni úshin" baby boıynsha qylmystyq is qozǵaldy. Bul rette kámeletke tolmaǵan jasóspirimniń ólim aldyndaǵy haty tabylǵan. Onda ol óziniń ólimine kinálilerdi anyqtap kórsetken. Sonymen birge mekteptiń beınebaqylaý kamerasyndaǵy kadrlar da alyndy. Qazir bul aqparattyń barlyǵy tekserilip jatyr", - dep habarlady Pavlodar oblystyq İİD baspasóz qyzmeti. Ólim aldyndaǵy hatynda ol óziniń ólimine muǵalimder men mektep-ınternatynyń dırektoryn aıyptaǵan. Oblystyq Balalar quqyn qorǵaý basqarmasynyń habarlaýynsha, dál qazirgi tańda ınternat tárbıelenýshilerimen psıhologtar toby jumys isteýde. "Biz bul jaǵdaıdy taldap, balalarmen jumys isteımiz. Árıne olar bolǵan oqıǵadan keıin qatty eseńgirep qaldy, depressıalyq kúıge tústi. Mektep janyndaǵy ınternatta balalar bir otbasy retinde ómir súrgen. Azdaǵan tragedıa oryn aldy, qazir munymen tergeý oryndary aınalysyp otyr", - dep túsinikteme berdi Pavlodar oblystyq Balalar quqyn qorǵaý basqarmasynyń basshysy Natalá Nefedova. Aıta keteıik, joǵarǵy synyp oqýshysynyń óliminen keıin Baıanaýyldaǵy mektep-ınternatynan birden jeti adam jumystan bosatyldy, olardyń arasynda tárbıeshiler men muǵalimder jáne oqý ornynyń dırektory da bar.