Ulttyq banktiń 2004-2009 jyldar aralyǵynda alynǵan problemalyq ıpotekalyq nesıeni qaıta qarjylandyrýy boıynsha aryz qabyldaý keler jyldyń 1 naýryzynda aıaqtalady, dep habarlady www.24.kz.

Osy ýaqytqa deıin 13 myń aryzdyń 8 myńy oń sheshimin taýyp, 48 mıllıard teńge kólemindegi qaryz qaıta qarjylandyryldy. Bıyl maýsym aıynan bastap iske asyryla bastaǵan baǵdarlamaǵa Ulttyq bank óz qorynan 130 mıllıard teńge bólgen. Bul qarajat ekinshi deńgeıli 9 bankke úlestirildi. Qarjy mekemesi bul aqshany keler jyldyń naýryz aıyna deıin ıgerýi tıis. Ulttyq bank baǵdarlamanyń áleýmettik baǵytyn eskerip, erejelerde birqatar jeńildik te qarastyrǵan.

«Halyqtyń áleýmettik osal toptaryna jatatyn qaryz alýshylarǵa qatysty taǵy bir ózgeris engizilgen. Olar memlekettik baj salyǵynan bosatylyp otyr. Osy baǵdarlamaǵa saı keletin qaryzdary boıynsha qaıta qarjylaımyn deıtin qaryz alýshy 1 naýryzǵa deıin bankke baryp aryz jazýy tıis», - dedi QR Ulttyq banki qarjylyq saýatty arttyrý basqarmasynyń bastyǵy Damılá Baıdildaeva.

Al teńge baǵamynyń erkin aınalymǵa shyǵarylýyna baılanysty ulttyq valútadaǵy depozıtke ótemaqy tóleý boıynsha salymshylardan aryz qabyldaý 1 jeltoqsanda aıaqtaldy. 200 myńǵa jýyq salymshy ótemaqy alýǵa aryz bergen. Bul jalpy alǵanda 73 mıllıard teńge. Erejelerge sáıkes, 1 mıllıon teńgege deıingi depozıti bar salymshy qarjysyn bankte taǵy bir jyl saqtaýy kerek. Kelesi jyldyń 30 qyrkúıeginde salymshy sol kezdegi jáne bıylǵy jyldyń 18 tamyzyndaǵy dollar baǵamyna qaraı ótemaqy alady.