Keshe Almatyda Qazaqstan Jazýshylar odaǵy men «Er Jánibek» Halyqaralyq qoǵamdyq qory kórnekti jazýshy Jaqsylyq Sámıtulynyń 75 jyldyǵyna oraı «Qazirgi qazaq prozasynyń ózekti máseleleri» atty ǵylymı-tájirıbelik konferensıa ótti, - dep habarlaıdy «Qamshy» portaly.

Konferensıaǵa tanymal ádebıetshi ǵalymdar men aqyn-jazýshylar qatysty.

Konferensıa barysynda jazýshynyń inisi Ǵylymhan Qalıulynyń qoldaýymen jaryq kórgen «Sary ala qaz» kitabynyń tusaýy kesildi.

«Konferensıaǵa qatysýshylar aǵamyz týraly, jazýshynyń shyǵarmashylyǵy jaıly keremet estelikterimen bólisip, qundy derekterdi, zertteýlerdi ortaǵa saldy. Osy jıynnyń ótýine atsalysqan barlyqtaryńyzǵa alǵys bildiremin» deıdi «Er Jánibek» qoǵamdyq qorynyń prezıdenti Jeńis Túrkıa myrza. 

Jaqsylyq Sámıtuly 1940 jyly Qytaıdyń Altaı aımaǵynda dúnıege kelgen. 1959-1979 jyldary Qytaıdaǵy «mádenıet tóńkerisi» kezinde ultshyl atanyp, Úrimji, Tarym, t.b. lagerlerde jazasyn ótegen.

1993 jyly Almatyǵa kóship kelgen.

«Atameken», «Taý samaly», «Aq tilek», «Aq sáýle», t.b. áńgime, povester jınaǵynyń avtory. 2000 jyly jazýshynyń «Qytaıdaǵy qazaqtar» monografıasy, 2010 jyly «Sergeldeń» trılogıasy «Qaharly Altaı» degen atpen basylyp shyqqan.