Búgindikke qazaqstandyq aýyr atletter Jasulan Qydyrbaev, Almas Óteshov jáne Ermek Ómirtaıdyń dopıng daýyna iligýi áleýmettik jelide qyzý talqylanyp jatyr. Kópshiliktiń aıtýynsha, atalǵan sportshylardy federasıa qazaq bolǵandary úshin qasaqana aıaqtan shalyp jatyr. Alaıda, keıbir azamattar jurtshylyqtyń bul ýájimen kelispeıdi. Naqtyraq aıtsaq, Halyqaralyq aýyr atletıka federasıasy sportshylardy ultyna qarap sporttan shettetip otyrǵan joq.
Úsh birdeı sportshymyzdyń dopıng daýyna iligýi, árıne ókinishti jáıt. Óıtkeni, atalǵan sportshylar Rıo-de-Janeıro olımpıadasynda júldege talasatyn birden-bir sportshylarymyz bolatyn. Ókinishke oraı, halyqaralyq aýyr atletıka federasıasy úsh sportshymyzdy dopıng paıdalandy dep kúdiktenip otyr. Alaıda, aýyr atletterimiz ózderiniń kinásiz ekendikterin dáleldeýge múmkindigi bar. Onyń ústine, Aýyr atletıkadan Qazaqstan quramasynyń bas bapkeri Alekseı Nı bul dopıng-synaqtardyń qorytyndysyna kúmánmen qarap otyr.
– Bul jigitter keshegi balalar emes, Qydyrbaev – álem chempıony, al Óteshov – álem chempıonaty men Azıa oıyndarynda kúmis júldeger boldy. Bul sportshylardyń deńgeıi joǵary, biz olardy Hústondaǵy jarysqa altyn men kúmis medaldar alady dep daıyndadyq. Sportshylarymyzdy dopıngsiz jáne osyndaı daýsyz daıyndaýǵa mıymyz jetpeı me sonda? Logıka bolýy kerek qoı. Sonda Razımov pen Zaıchıkov nege ustalmady? Biz bir komandamyz, birge daıyndaldyq, sondyqtan suraq kóp. Úshtikke kire almaǵan qatardaǵy sportshylar ustaldy dese bir jón, al bul jigitter medal alýǵa daıyn, bul - nonsens. Basshylyqtyń ne sheshetini 28 jeltoqsanda belgili bolady, – dedi Alekseı Nı.
Iá, bul daýdyń qalaı aıaqtalatyny aldaǵy ýaqytta belgili bolady. Sondyqtan da oǵan deıin bas bapker qol qýsyryp qarap otyrmaý kerek deıdi. Naqtyraq aıtsaq, Qazaqstan aýyr atletıka federasıasy sportshylardyń kinásizdigin dáleldep shyǵýy kerek. Áıtpese, Jasulan Qydyrbaev pen Almas Óteshov Rıoda ótetin Olımpıada oıyndaryna bara almaı qalady. Bul olardy qazaqtan shyqqan olımpıada chempıony bolý baqytynan aıyrady.
Mine, osyǵan ókingen azamattar «úsh sportshyny qazaq bolǵannan keıin aıaqtan shalyp otyr» dep áleýmettik jelide jazyp jatyr. Alaıda, ekinshi tarap «halyqaralyq aýyr atletıka federasıasy sportshylardyń ultyna qarap shekteý jasamaıdy» degen pikirde. Solardyń biri «Alaman» ulttyq sport portalynyń redaktory, belgili sport jýrnalısi Rýslan Medelbek. Onyń aıtýynsha, federasıa úshin qazaq pen orystyń nemese koreıdiń dopıng daýyna iligýi mańyzdy emes.
– Ázirge Almas Óteshov, Jasulan Qydyrbaev, Ermek Ómirtaı dopıng qoldanýy múmkin degen kúdikke ilinip otyr. Federasıa áli naqty sheshim shyǵarǵan joq. Al, naqty sheshim ekinshi ret analız tapsyrǵan soń 6 aıdan keıin shyǵýy múmkin. Bul arada qazaqty aıaqtan shalý sıaqty eshqandaı quıtyrqy saıasat joq. Ia, sportshylarymyz kúdikke ilindi. Alaıda, aýyr atletterimizdiń dopıng qoldanbaǵanyn osy salaǵa jaýapty Mádenıet jáne sport mınıstrligi dáleldeýi kerek. Eger olar ekinshi analızden taza shyqpasa, sportshylarymyz sporttan ketedi. Al, ol kezde mınıstrliktiń qolynan tek aýyr atletterdiń sporttan ketý ýaqytyn qysqartý ǵana qalady. Máselen, olarǵa beriletin jaza 2 jyl emes, 9 nemese 6 aıǵa qysqarady, – deıdi Rýslan Medelbek.
Iá, endigi úmit Mádenıet jáne sport mınıstrligi men Qazaqstan aýyr atletıka federasıasynyń jumysyna baılanysty bolyp otyr. Eger olar belsendi jumys jasap, aýyr atletterdiń kinásizdigin dáleldeı alsa, atalǵan azamattar Rıo-de-Janeıro Olımpıadasyna barady. Al eger shynymen sportshylarymyz kináli bolyp shyqsa, ókinishten ózegimiz órtengennen basqa amal joq. Sebebi, aýyr atletıkadan qazaqtan shyqqan tuńǵysh olımpıada chempıonyn kórý múmkindigi birneshe jylǵa shegeriledi.
Serik JOLDASBAI
Astana
