«Qazaqstanda jańa jyldy merekeleýge destrýktıvti dinı aǵymdardy ustanýshylar ashyq qarsylyq bildirýde», - dep málimdedi QR Mádenıet jáne sport mınıstrligi Din isteri komıtetiniń tóraǵasy Ǵalym Shoıkın.

«Bul máseleni sóz etkende eń aldymen merekeniń eshbir dinı meıram emes ekenine nazar aýdarý kerek. Qazaqstanda eshkim, eshqandaı dinı uıym bul merekeni dinı mereke retinde atap ótpeıdi jáne bul kúni eshkimge qulshylyq jasamaıdy, eshqandaı dinı rásimder ótelmeıdi. Iaǵnı, dinge qatysy joq. Bul – Rojdestvo merekesi emes» degen Din isteri komıtetiniń basshysy Jańa jyl merekesin atap ótpeýge shaqyrý kóbinese radıkaldy ustanymdaǵy dindarlardyń bastamasy ekenin aıtady.

Onyń aıtýynsha, dinı mereke Rojdestvo jańa jyldan bólek atalyp ótetindikten, bul jerde eshqandaı dinı alaýyzdyq týǵyzýdyń qajeti joq.

«Ol (Jańa jyl – red.) álemniń kóp elderinde dinine, ultyna qaramaı merekelenedi. Eger meıram jurtqa, balalarǵa qýanysh ákelse, osy meıram arqyly otbasylyq jyly qarym-qatynastar nyǵaısa, aq tilekter aıtylsa, osy meıram kezinde qaıyrymdylyq sharalary, basqa da ıgi jumystar júrgizilip jatsa, Jańa jyldy nege atap ótpeske?» deıdi Ǵalym Shoıkın myrza.

Din isteri komıtetiniń jetekshisi keı din ókilderiniń bul narazylyǵyn olardyń barlyq mereke ataýlyǵa qarsylyq bildiretin, kertartpa áreketterimen baılanystyrady.

«Bul radıkaldardyń aınalasymen sanaspaıtyndyǵynyń kezekti bir kórinisi. Destrýktıvti aǵymdar zaıyrly is-sharalarǵa únemi qarsylyq bildirýde. Tipti, olar Naýryz meıramyn da tarıhı tamyry tereńde bolsa da merekeleýge qarsy bolýda. Mundaı aǵymdar ıslamdaǵy merekelerge de qarsy. Musylmandardyń kóbi Muhammet paıǵambardyń týǵan kúni – Máýlitti mereke retinde atap ótedi. Osy mereke kezinde de musylman jamaǵatynyń arasyna jik salýǵa tyrysady», - degen Qazaqstannyń eń aldymen zaıyrly memleket ekenin nazarda ustaýǵa shaqyrady.

«Bizdiń elimizdiń óz tarıhy, onyń ishinde ıslam damýyndaǵy qazaqtardyń óz qundylyqtary bar. bizdiń ol dástúrlerimiz qazaqtyǵymyzdyń basty quraýshysy. Biz óz mádenıetimizdi, tilimizdi, salt-dástúrlerimizdi, tól tarıhı sanamyzdy qalyptastyrýdamyz. Bul bizdi jahandasý dáýirinde buqaralyq mádenıetke jutylyp ketýden saqtaıdy. Radıkaldardyń shabýyldary bizdi osy ımýnıtetten aıyrýǵa baǵyttalǵan», - degen Ǵ. Shoıkın qazaqstandyqtardy túrli alaýyzdyq týǵyzatyn áńgimelerge erip ketpeýge shaqyrdy.