Mońǵolıa boks federasıasy 2015 jylǵy úzdik 10 boksshynyń tizimin jarıalady. Olardyń ekeýi – Nurlan Asqaruly men Erbolat Tólekuly – sol elde týyp-ósken etnıkalyq qazaq azamattary, - dep habarlaıdy «Qamshy» portaly Azattyq radıosyna silteme jasap.
Mońǵolıanyń bıylǵy úzdik 10 boksshysynyń biri Nurlan Asqaruly (52 kılogramm salmaqta bokstasady) – halyqaralyq dárejedegi sport sheberi, 2015 jylǵy el birinshiliginiń qola júldegeri, halyqaralyq «A» dárejeli týrnırden bir kúmis jáne eki qola medal ıelengen sportshy.
Al ekinshisi Erbolat Tólekuly (91 kılogramnan aýyr salmaqta saıysady) – sport sheberi, 2015 jylǵy el chempıony, halyqaralyq «A» dárejedegi týrnırden eki kúmis medal ıelengen boksshy.
«ÚSH AI DAIYNDALYP QOLA MEDAL ALDYM»
21 jastaǵy Nurlan Asqaruly – Mońǵolıa astanasy Ulanbatyr qalasyndaǵy dene shynyqtyrý ýnıversıtetiniń tórtinshi kýrs stýdenti. Ol bokspen 15 jasynan beri ǵana aınalysa bastaǵan.
- Boks úıirmesine baratyn aǵamnan anda-sanda úıde sabaq alǵanym bolmasa, oǵan deıin bokspen aınalyspadym. Alǵash 2009 jyly aǵama erip boks seksıasyna bardym. Úsh aıdan keıin Mońǵolıanyń jasóspirimder arasynda ótken týrnırinde qola medalǵa ıe boldym. Bokspen aınalysýyma osy jeńis túbegeıli áser etti, – dedi Nurlan Azattyq tilshisine.
Nurlan Asqaruly 2010 jyly jasóspirimder arasynda ótken el birinshiliginde altyn medal ıelengen. Ol eresekter arasynda ótken el birinshiliginde 2011, 2013 jáne 2015 jyldary – qola, 2014 jyly – kúmis medal alǵan. Atyraý qalasynda ótken Isataı men Mahambet atyndaǵy týrnırdiń 2014 jylǵy jeńimpazy, 2015 jyly kúmis júldegeri bolǵan Nurlan basqa da halyqaralyq jarystarda júlde alǵan.
Bıyldan bastap 56 kılogramm salmaq dárejesinde rıngke shyǵýǵa daıyndalyp júrgen Nurlan Asqaruly «bolashaqtaǵy maqsatym – olımpıadaǵa qatysý» deıdi.
Sportshynyń burynǵy bapkeri, Baıan-Ólgıı aımaqtyq boks federasıasynyń tóraǵasy Qaınar Qaısanaıuly Nurlan Asqarulyn «boksqa óte kesh kelse de, jyldam jetistikke jetken talantty boksshy» dep sıpattaıdy.
- Árıne, ózge el, ózge jer bolǵandyqtan ótken jyldary ulttyq turǵydan aıaqtan shalý boldy. Sonda da Nurlan óziniń kim ekenin dáleldeı aldy. Sonyń arqasynda bıyl birshama halyqaralyq jarystarǵa joldama aldy, – deıdi Qaınar Qaısanaıuly.
«ARTYQTAÝ TÚSSEŃ – TEŃSİŃ, TEŃ TÚSSEŃ – KEMSİŃ»
Azattyq tilshisi bıyl Mońǵolıanyń úzdik boksshylarynyń ondyǵyna engen taǵy bir etnıkalyq qazaq Erbolat Tólekulymen (25 jasta) tildese almady. Týystary onyń ýaqytsha demalys alyp, aýylyna ketkenin aıtady.
Erbolatty da jarysqa daıyndaǵan bapker Qaınar Qaısanaıulynyń sózinshe, sportshy áýeli 2008 jyly el birinshiliginde 81 kılogramm salmaqta qola medal alyp kózge túsken. Erbolat Tólekuly 2010 jyly stýdentter arasynda ótken el birinshiliginde – kúmis medal, 2011 men 2013 jáne 2014 jyly eresekter arasynda ótken el birinshiliginde – kúmis medal, 2012 jyly eresekter arasyndaǵy el birinshiliginde jáne tórt jylda bir ret bolatyn búkilhalyqtyq spartakıadada altyn medal ıelengen. Ol 2011 jyly Isataı men Mahambet atyndaǵy halyqaralyq týrnırde (Qazaqstan) kúmis medal alǵan.
- Erbolat 2012 jyldan beri Mońǵolıanyń aýyr salmaqtaǵy boksshylaryn bastap keledi. Biraq Mońǵolıa boks federasıasynyń sheshimimen olımpıadalyq oıyndarǵa jiberilmeı otyr. Óıtkeni boks federasıasy «Aýyr salmaqta eshqandaı jetistikke jete almaımyz, sol sebepti bosqa aqsha shyǵyndaýdyń qajettiligi joq» degen pikirde, – deıdi bapker Qaınar Qaısanaıuly.
Qazir Mońǵolıanyń bokstan ulttyq quramasynda eki qazaq qana júrgenin aıtqan bapker «buǵan sebep – aımaǵymyzda boks mektebiniń damymaı qalǵany» dep qynjylady.
- 2009 jyldan beri bizdiń jastar shamasy jetkenshe jylyna bir ret Qazaqstanǵa – bokstan olımpıadaǵa daıarlaý ortalyǵyna baryp, solardyń oqý-jattyǵý jıynyna qatysyp keledi. Qazir munyń nátıjesin kórip jatyrmyz. Oǵan deıin Baıan-Ólgııdegi bokspen aınalysatyn jastar arasynda báseke bolmaǵandyqtan jigitter múldem óspeıtin, – deıdi Baıan-Ólgıı aımaqtyq boks federasıasynyń tóraǵasy Qaınar Qaısanaıuly.
Onyń sózinshe, Mońǵolıadaǵy qazaq boksshylary jarysta ozyp shyǵý úshin qarsylastaryn aıqyn basymdyqpen utýǵa tyrysady. «Óıtkeni saıysta teń bolsań – kem bolasyń, al sál artyqtaý bolsań – teń bolasyń» deıdi bapker.
