Búginnen bastap zeınetaqy men járdemaqy kólemi ózgeredi. Iaǵnı, Úkimet osy sanattaǵy tólemdi sáıkesinshe 9-dan 32 paıyzǵa deıin ósirgen edi. Budan bólek atalǵan ózgeristerdiń memlekettik qyzmetshiler men shákirtaqy alatyn stýdentterge de qatysy bar, - dep habarlaıdy 24.kz.
Ábishevter otbasy dári-dármek pen azyq-túlikten kóp alady. Óıtkeni bertin kele otaǵasy Qalqaman Súleımenulynyń júregi syr bere bastaǵan. Al Úmitjan apaıdyń ózi qan qysymy jıi kóteriletinin aıtady. Sondyqtan quny qymbat bolsa da, kórsetken dárilerdi satyp alýǵa májbúr. Budan bólek, komýnaldyq tólemder men basqa da kerek-jaraq taǵy bar. Sondyqtan zeınetaqynyń ósetinin estigende, bul otbasy erekshe qýandy.
Úmitjan Ábisheva, zeınetker:
- Buǵan deıin 62 myń teńge alyp keldim. Eńbek ótilim - 37 jyl. Osyny eskerip, endi zeınetaqymdy 68 myń teńgege kóterdi. Qosylǵan aqsha kishkentaı bolyp kóringenimen, biz úshin bul – úlken kómek. Úmitjan apaı sıaqty elimizde 2 mıllıonǵa jýyq zeınetker bar. Olardyń barlyǵy da endi zeınetaqyny 9 paıyzǵa kóp alady. Budan bólek negizgi, ıaǵnı, bazalyq tólem kólemi de ózgertildi. Qazir ol – 11 myń 965 teńge. Sáıkesinshe, eń tómengi zeınetaqy endi 37 myń 789 teńgeni quraıdy.
Jadyra Dáýlethanova, QR Densaýlyq saqtaý jáne áleýmettik damý mınıstrligi basqarmasynyń jetekshisi:
- Mınımaldy zeınetaqy kólemi 25 myń 824 teńgeni qurap otyr. Bazalyq zeınetaqy tólemimen qosa eseptegende, 37 myń 789 teńgeni quraıdy. Sonymen qatar múgedektigi boıynsha jáne asyraýshysynan aıyrylǵandardyń járdemaqylary 7 paıyzǵa artady. Bıyldan bastap múmkindigi shekteýli jáne asyraýshysynan aıyrylǵan jandar kólemi eselengen járdemaqy alady. Buǵan qosa, dál osyndaı ózgeristerdiń dáriger, muǵalim jáne basqa da memlekettik qyzmetkerlerge qatysy bar. Olardyń aılyǵy eńbek ótili men jumys nátıjesine qaraı kóterilip otyrady.
Jabal Erǵalıev, QR Parlamenti Senatynyń depýtaty:
- Bolyp jatqan daǵdarystar kezinde damyǵan Eýropanyń ózi azamattardyń eńbekaqylaryn qysqartyp jatqanda, Qazaqstan jyl saıyn ósirip kele jatyr. Máselen, 2016 jyldyń ózinde dárigerlerdiń, muǵalimderdiń, «B» tobyndaǵy memlekettik qyzmetkerlerdiń jalaqylary ortasha eseppen 30 paıyzǵa ósedi. Buǵan Elbasy tolyq múmkindigimiz bar ekendigin aıtty. Mamandardyń aıtýynsha, bul bastamalar el ekonomıkasynyń turaqtylyǵy men onyń jyl sanap damý deńgeıin kórsetedi. Aıtpaqshy, dál osy qýanyshty jańalyqtyń stýdentterge de qatysy bar. Bıyldan bastap olar shákirtaqyny 25 paıyzǵa artyq alady.
