2016 jylǵy 1 qańtardan bastap Qazaqstan Dúnıejúzilik saýda uıymynyń tolyqqandy múshesi atanady. 20 jylǵa sozylǵan resmı kelissózder nátıjesi osy jyly sátti aıaqtaldy, - dep habarlaıdy «Qamshy» portaly.

Elimiz halyqaralyq uıymnyń qataryna qosylǵan 162-múshesi boldy. Bul tarıhı oqıǵaǵa qatysty Elbasy Nursultan Nazarbaev arnaıy málimdeme jasap, Qazaqstan ózine tıimdi sharttarǵa qol jetkizgenin aıtty. Qoı jylyndaǵy basty oqıǵalardyń biri – Qazaqstannyń Dúnıejúzilik saýda uıymyna kirý jónindegi 20 jylǵa jýyq júrgizilgen kelissózderdiń tabysty aıaqtalýy. Ulttyq múdde jan-jaqty eskerildi. Eń basty jetistik – bul aýyl sharýashylyǵyna bólinetin sýbsıdıa mólsheri.

Uıym sharty boıynsha memleket bıznesti qoldaýyn shekteý qajet. Alaıda Qazaqstan úshin memlekettik sýbsıdıa kólemi 8,5% kúıinde saqtaldy, al aýylsharýashylyq salasyn qoldaý ónimniń jalpy paıdasynyń 17%-yn quraıtyn bolady.

Gúlnár Isaeva, QR Aýyl sharýashylyǵy mınıstriniń orynbasary:

- Biz úshin qazir, eń bastysy, ınfraqurlymdy damytyp, logıstıka júıesin ońtaılandyrý. Taýar óndirýshiler baǵa jaǵynan básekege qabiletti bolý úshin osy máselelerdi sheshýimiz qajet. Qazirgi tańda ǵylym, sharýalardy oqytý isine memlekettik qoldaý kólemin arttyrý boıynsha sharalar atqarylýda. Úlken uıym. Tıisinshe, úlken báseke. Salystyryp qarasaq, bizdiń saýda-sattyǵymyzdyń anaý-mynaý emes, 90%-y Dúnıejúzilik saýda uıymyna múshe elderge tıesili. Endi otandyq kásipkerler meılinshe saýatty qurylǵan saýda naryǵyna túsedi. Tek talap kúsheıedi. Ózindik quny tómen, jurt qyzyǵatyndaı sapaly taýar óndirseń ǵana uıymnyń qyzyǵyn kóresiń. Tutynýshy úshin de paıdasy az emes. Endi sheteldik taýar bizdiń naryqqa kedergisiz keledi. Baj salyǵy tómendeıdi, tıisinshe baǵa da arzandamaq.

Tımýr Kýlekın, Astana qalasynyń Memlekettik kiris departamentiniń bólim jetekshisi:

- Búgingi tańda 1347 taýar túrine salynatyn baj salyǵynyń arzandaıtyny belgili. Munyń qandaı artyqshylyǵy bar? Qazaqstandyq salyq tóleýshiler sheteldik taýarlardy úshinshi elderden alyp kelip, olardy tómendetilgen tarıfpen rásimdeı alady. Bul uıymǵa múshe ózge elderdiń tájirıbesine kóz júgirtsek. Mysaly, damyǵan Qytaıdyń ózi jahandyq saýdanyń elıtasyna kirý úshin 15 jyl kelissóz júrgizgen. Bul elde alǵashqy jyldary básekege tótep bere almaǵan júzdegen kásiporyn bankrot boldy. Mundaı jaǵdaı bizde qaıtalanbasyna kepil joq. Prezıdenttiń ózi básekege daıyn bolý kerek ekenin san márte eskertti. Dúnıejúzilik saýda uıymy atty alyp aıdynǵa shyqqaly turmyz. Mundaǵy oıyn tártibi qatań. Básekege shydaǵan myqtylar ǵana jaǵaǵa shyǵady.

Derekkóz: 24.kz