Reseı Prezıdenti Vladımır Pýtın ýkraın taýaryn Qazaqstanǵa tasymaldaýdy retteıtin Jarlyqqa qol qoıdy, - dep habarlaıdy «Qamshy» portaly RIA Novostı-ge silteme jasap.

Jarlyqta Ýkraınada óndirilgen taýarlardy Eýrazıalyq Ekonomıkalyq odaq múshesi Qazaqstanǵa tasymaldaýdyń tártibi bekitilgen. Atap aıtqanda, qazaq eline jol tartqan taýarlar Reseı aýmaǵyna tek Belarýsıa shekarasy arqyly ǵana ótýi tıis. Sonymen qatar, júkter kedergisiz Qazaqstanǵa ótýi úshin túgel plombalanǵan, GLONASS ǵalamdyq navıgasıalyq baqylaý júıesine qosylǵan kólikter arqyly ǵana tasymaldanýy kerek eken. Sondaı-aq, Reseı taraby júk tasýshy kólik júrgizýshileriniń tirkeý talondarynyń bolýyn da mindettep otyr.

Qazir Reseı úkimeti atalǵan plombalardyń nusqasyn bekitý men olardy qoldaný tártibin qarastyryp jatyr. Bul ózgerister Ýkraına men Reseı arasyndaǵy kıkiljiń saldarynan Reseıdiń Ýkraınaǵa qatysty erkin saýda aımaǵy týraly kelisimdi toqtatýyna baılanysty jasalyp otyr. Kreml atalǵan shekteýler resmı jarıalanǵan kúnnen bastap 1 shildege deıin sozylatynyn habarlady.

Osylaısha, saýda-ekonomıkalyq qarym-qatynasqa negizdelgen Eýrazıalyq ekonomıkalyq odaqtyń 2016 jylǵy jumysy Reseıdiń odaqtastaryna ekonomıkalyq shekteý qoıýymen bastalyp otyr.