Belgili ult janashyrlary Muhtar Taıjan, Aıdos Juqanuly, Qasym Amanjoluly  Almaty qalasy, Tilderdi damytý, murǵattar jáne qujattama basqarmasyna Almaty qalasyndaǵy Mırzoıan kóshesiniń atyn ózgertý týraly  hat jazǵan eken. Oǵan basqarmadan qandaı jaýap kelgenin qarańyz:

 «Levon Isaevıch Mırzoıan HH ǵasyrdyń 30 jyldarynda Qazaqstanda basshylyq qyzmette  boldy. Sol  jyldardaǵy  onyń  saıası qyzmeti ártúrli baǵalanýda. Bir jaǵynan L.I.Mırzoıan Qazaqstandaǵy  asharshylyq zardaptaryn  jeńýge úlken eńbek sińirgenin joqqa shyǵarýǵa bolmaıdy.  Sonymen  qatar,  onyń 1937-1938 jyldardaǵy qýǵyn-súrginge keleńsiz róli jaıly muraǵat  derekteri  ashylýda. Sizderdiń joldaǵan  qujattaryńyzdyń kóshirmesi sonyń bir  aıǵaǵy. Degenmen sol  qujattar qandaı jaǵdaıda  jazylǵanyn áli eshkim bilmeıdi. Al, L.I.Mırzoıan atyndaǵy  kósheni ózgertý máselesinde, birinshiden, asyqpaǵan jón. Ekinshiden,  zańnamaǵa sáıkes ol  boıynsha  Onomastıkalyq  komısıa sheshim qabyldaýy kerek» dep Sh.Ýálıhanov atyndaǵy Tarıh jáne etnologıa ınstıtýtynyń ýájin alǵa tartypty. Ary qaraı  "Qala  turǵyndarynyń  ýaqtyly áleýmettik kómek  alýyna jáne jedel járdem shaqyrýyna jaǵdaı jasaý  maqsatynda Almaty qalasynyń onomastıka komısıasynyń otyrysynda birinshi  kezekte ataýy  joq  jáne  ataýy qaıtalanatyn kóshelerge atyn berý máselesi  qaralady. Oblys aýmaǵynan eldi mekenderdiń qosylýyna baılanysty osyndaı kósheler kóbeıip keledi. Osyǵan  oraı, joǵarydaǵy másele  sheshimin  tapqannan keıin tarıhı turǵyda eskirgen kóshelerdiń ataýyn ózgertý kezeń-kezeńimen júzege  asyrylatyn bolady" dep danyshpandyq sheshim qabyldaǵan eken Basqarma basshylyǵy.

Al, munda atalǵan Mırzoıan kim edi? Ýalıhanov ınstıtýty ne aıtyp otyr? Zer  salaıyq: Levon Isaevıch Mırzoıan, 1933-1938 jyldar aralyǵynda Qazaq­stan Ortalyq Partıa Komıtetiniń birinshi hatshysy bolǵan. Ol saıası qýǵyndaýmen  qatar, josparly júzege asyrylǵan atý-asý sharalaryn atqarǵan Mırzoıan edi. Qazaqstanda basshylyqta bolǵan jyldarynda 1760 qazaqty mert qylǵan.  Iaǵnı 5 jyldan astam ýaqytta kún saıyn bir qazaqty qurbandyqqa shalyp otyrǵan deýge keledi.

Basqany qoıshy, dardaı aty bar Ýálıhanov atyndaǵy ınstıtýt ne aıtyp otyr? "L.I.Mırzoıan atyndaǵy  kósheni ózgertý máselesinde, birinshiden, asyqpaǵan jón. Ekinshiden,  zańnamaǵa sáıkes ol  boıynsha  Onomastıkalyq  komısıa sheshim qabyldaýy kerek" depti ǵalymdar. Endeshe, ózderi aıtqandaı "Qazaqstandaǵy  asharshylyq zardaptaryn  jeńýge úlken eńbek sińirgen" Mırzoıan myrzanyń atyn Almaty qalasynyń kóshesine emes ınstıtýttarynyń atyna qoıǵany jón. Óıtkeni Ýálıhanov atyn kótere almaıtyny joǵarydaǵy emeýrinderinen-aq kórinip tur.