«Búgin Parlament Májilisi tarqatylyp, naýryz aıynda saılaý ótýi múmkin» degen alyp qashpa áńgime shyqty. Alaıda, bul boljamnyń qanshalyqty ras-ótirigin dóp basyp aıtý qıyn. Desek te, jýyq arada Parlament óz jumysyn aıaqtap, elimizde jańadan saılaý ótýi ábden múmkin. Al, sol saılaý óte qalǵan jaǵdaıda odan qarasha halyqqa qandaı qaıyr bar?
Kezinde Alash arystary «Qazaq» gazetinde «Dýmada qazaqtan depýtat joq» dep másele kóteýmen ótti. Óıtkeni, patshaly Reseı qazaqty buratana dep tanyp, onyń depýtat bolý quqyǵynan aıyrdy. Alash arystary «eger qazaqtan Dýmada depýtat bolsa, bizdiń muń-muqtajymyzdy Parlamentte kóteredi» dep eseptedi. Alaıda, İ jáne İİ Dýmadan keıin qazaqqa sol kúıi depýtattyq buıyrmady. Ókinishti.
Al, qazirgi tańda Allaǵa shúkir Táýelsizdik alyp, óz aldymyzǵa jeke memleket boldyq. Mine, osy Táýelsizdiktiń arqasynda Májilistegi 107 depýtattyń basym kópshiligi qazaqtar qurap otyr. Alaıda, olardyń ulttyq múddeni tý etip, másele sheship jatqandary saýsaqpen sanarlyqtaı ǵana. Al, qalǵan depýttattar «as iship, aıaq bosatqannan» basqa halyqqa paıda keltirip jatqan joq. Sondyqtan da aldaǵy saılaýda taǵy da sol depýtattar Parlmentten oryn alsa, odan qarasha halyq qandaı paıda kóredi? Eshqandaı. Endeshe aldaǵy Parlament saılaýynan úmit kútýdiń ózi uıat nárse.
Áıtse de, bılik endigi kezekte Májiliske degen halyqtyń senimin kúsheıtemiz dep oılasa ultshyldarǵa múmkindik bergeni jón. Aıtalyq jańarǵan Parlamentke Aıdos Sarym, Muhtar Taıjan, Murat Ábenov, Máýlen Áshimbaev, Berik Ýálı, Rasýl Jumaly syndy ulttyq-demokratıalyq ustanymdaǵy azamattar ótse, Parlament tórinde ulttyń sózi sóılense Májilistiń máni artar edi. Óıtkeni, Májiliste talqylanýy tıis kóptegen máseleler qoǵamdyq ortadan aryǵa asar emes. Al, qoǵamnyń ashý-yzasy kúnnen kúnge ósip kele jatyr. Mine, osy ashý-yzanyń asqynyp ketpeýi úshin Parlamentte ultshyldarǵa oryn berilýi kerek. Alaıda bılik ultshyldarǵa senim arta qoıarma eken? Bul jaǵy belgisiz.
Bizdiń májilis depýtattary qanatyn kesip tastaǵan búrkit sıaqty qaýqarsyz. Qandaı da bir ótkir máselege baılanysty olardan pikir surasań kibirtiktep jaýap bere almaı jatady. Óıtkeni olar joǵary jaqtan «Depýttat bolǵannan keıin ótkir másele kótermeısiń» dep tapsyrma alǵan. Mine, sol tapsyrmany «halyq qalaýlylary» buljytpaı oryndap otyr. Al ultshyldarǵa múmkindik berilse, olar qansha tapsyrma alsada ult máselesin kóterýden taısalmas edi. Uzyn sózdiń qysqasy ultshyldarǵa depýtattyq mandat berilmese Parlamentten eshqandaı paıda joq.
Serik JOLDASBAI
Astana
