NATO bas hatshysy Anders Fog Rasmýssen Reseıdi Ýkraınadan áskerin alyp ketip, bul eldiń ishki isine aralasýdan bas tartýǵa shaqyrdy. Anders Fog Rasmýssen bul týraly keshe Brússelde NATO-ǵa múshe 28 eldiń elshileri qatysqan tótenshe jıynda málimdedi.

Segiz saǵatqa sozylǵan kezdesýde aláns eki jaqty “máseleni tez arada dıalog arqyly, BUU Qaýipsizdik keńesi nemese EQYU bastamasymen halyqaralyq baqylaýshylardyń qatysýy arqyly sheshýge” shaqyrdy.

Keshe jıynnan buryn Rasmýssen Reseıdiń Ýkraınanyń Qyrym avtonomıalyq respýblıkasyna áskerin jiberýi “Eýropadaǵy beıbitshilik pen qaýipsizdikke qater tóndiredi, Máskeý áskerı áreketterin dereý toqtatýy tıis” degen.

1 naýryz kúni Reseıdiń Federasıa keńesi biraýyzdan Reseı qarýly kúshterin Ýkraına terıtorıasynda paıdalaný týraly Pýtın usynysyn qoldady. Reseı prezıdenti Vladımır Pýtın Federasıa keńesinen “jaǵdaı turaqtanǵansha Ýkraına terıtorıasynda ásker paıdalanýǵa” ruqsat suraǵan edi. Reseı parlamentiniń joǵarǵy palatasy – Federasıa keńesi spıkeri Valentına Matvıenkonyń aıtýynsha, qaýly qabyldanǵan mezetten bastap kúshine engen.