Jambyl oblysynda bolǵan jantúrshigerlik oqıǵa taǵy da kópshiliktiń nazaryn aýdaryp, talqylaýǵa tústi. Oblystyń Talas aýdanynda onynshy synyptyń oqýshysy kólikte bosanyp, náresteni jol jıegine laqtyryp ketken. Aýyr jaraqattan jańa týǵan sábıdiń bas súıegi jarylyp, birden shetinep ketken...
Mine, bul birneshe kúnnen beri elimizdegi telearnalar jańalyqtarynan túspeı kele jatqan basty taqyryp desek bolady. Basty taqyryp demeı ne deımiz? Kúnde ne bolyp, ne qoıǵanyn, kimniń jazalanatynyn, kimniń jumystan ketkenin búge-shúgesine deıin aqtaryp jatyr arnalar.
Kún saıyn dabyra qylyp, sensasıa jasap, bolǵan oqıǵany qaıta-qaıta jańalyqtardan kórsetip, elge jarıalaý qanshalyqty qajet? Ol qyzdyń keleshek taǵdyryna úlken soqqy jasap jatyrǵandaryn sol arnalar túsinse ǵoı. Nege bizdiń telearnalar sol jaǵynan oılanyp, saralamaıdy? Eger osy oqıǵany búkil elge dabyra qylmaı, qajetti oryndar ǵana zań júzinde tıisti sharalar qoldansa da jetpeı me? Qatelik ketti ony moıyndaýymyz kerek. Alaıda buǵan barsha qoǵam kináli. «Adam balasyn zaman ósiredi, kimde-kim jaman bolsa, onyń zamandasynyń bári vınovat» demep pe edi uly Abaı?! Endeshe, qarshadaı qyzdy qaralaı bergenimiz jón be? Ózi sorlap, qınalyp jatyrǵan qyzdyń jarasyna tuz seýip, odan saıyn jaǵdaıdy ýshyqtyrýdyń qajeti qansha?! Bul sensasıalardyń artynda bir qyzdyń taǵdyry, bir áýlettiń, tipti ulttyń qadiri jatyr. Qyzdarymyzdy qaralaý arqyly ultymyzdy masqaralap otyrǵanymyzdy nege túsinbeımiz?
Odan da osyndaı jaǵdaılar bolashaqta qaıtalanbas úshin ne isteýimiz kerek? Balalar men jasóspirimder tárbıesi nege kemshin? degen syndy suraqtarǵa bas qatyryp, nege solardy sheshý jolyn izdemeımiz? Áıtpese ár jańalyq saıyn sol oqıǵany qazbalaı bergennen ne utamyz? Sol telearnalar urpaqqa shynymen jandary ashysa, úndi serıaldary men ár bes mınýt saıyn qaıtalanatyn jarnamalarynyń ornyna jastarǵa tárbıe beretin, ımandylyqqa shaqyratyn beınerolıkter júrgizip, ǵıbratty baǵdarlamalar kórsetsin, jastarymyzdyń ulttyq dástúrimizge úńilýlerine barynsha kúsh salsyn. BAQ halyqtyń kózi, qulaǵy bolsa, sizderdiń urpaq tárbıesine qosar úlesterińiz úlken. Alaıda, telearnalar urpaq tárbıesinen góri, sensasıa jasap, ózderine upaı jınaýdy kóbirek oılaıdy.
Venera Muratqyzy,
Astana
