«Ázil áleminde» júrgen keshegi jas jigitterdiń aldy búginde aǵa býynǵa aınalyp úlgerdi. Solardyń biri qazaqtar, qazaqy otbasy tóńireginde ázil aıtyp, óz kórermenin jınaǵan Tursynbek Qabatov. Qyryqqa taıaǵan ol bir kezderi kóńildi tapqyrlar klýbynyń oıynshysy bolatyn. Sosyn «Agrarka sarbazdaryna» jetekshilik etti, birshama komedıalyq qazaq kınolarynda akter retinde tanyldy. Osylaı ózin ár qyrynan kórsetip júrgen óner ıesi 2011 jyly «Bazar joq» teatryn ashty. Eń alǵashqy konsertin dúısenbi kúni qoıǵan kvn-shy bazar jaǵalaıtyn qarapaıym halyq, bazar joq bolǵan soń konsertke keler degen úmitpen keshtiń atyn «Bazar joq» dep qoıypty.
Búginde sol «Bazar joqtyń» tasy órge domalap tur. Kileń saıdyń tasyndaı myqtylardy jınaǵan ázil ordasynyń aıtary da, kórermeni de az emes. Qarapaıym turmys-tirshiliktiń kúıbeńin sýrettep, kórermenin qyran-topan kúlkiniń astynda qaldyratyn teatrdyń artyqshylyǵy az emes. Alaıda, sońǵy kezderi «Osy Qabatov qazaqtardy beıshara etip kórsetkenin qashan qoıady?» - dep shamdanǵan kisilerdi de kórip júrmiz. Tursynbek aıtpaqshy, «Biz qazaq árnárseniń jaqsy jaǵyn baıqamaıdy ekenbiz ǵoı. Jaman jaǵyn baıqaımyz». Áıtkenmen, ol óziniń osy qoıylymynda: «Mal túgili adamnyń atyn durys aıtpaımyz»,-dep birqatar qazaqtardyń kemshiligin tize kelip, «Jaqsy nárse oılasaq jaqsy nárse beredi. Bir balaǵa sen aqyldy balasyń dese, ana bala uıalǵanynan aqyldy bolyp ketedi eken da. Al biz týpoı deımiz. Sosyn ol júredi men týpoımyn, dym bilmeımin dep»,-deıdi. Sóıtip sóz sońyn: «Jaqsy nárseler baıqap júrsek, jaqsy nárseler bolady, aǵaıyn»,-dep aıaqtaıdy. Biraq osy kisiniń nege qazaqtardan jaqsy nárseni baıqaı qoımaıtyny bizdi de oılandyrady. «Jamandasań ákeńdi, saǵan ákep, Jaqsy ákesin bere me basqa bala» degendeı óz elimizdi, óz ultymyzdy qaralaı bersek kórgen basqa ne deıdi, basqa jurt ne istemeıdi?!
Reseıde Mıhaıl Zadornov: «Kogda smeshno, togda ne strashno»,-dep biraz eliniń kemshiligin jipke tizgenimen, kóbine Reseıdi basqa memlekettermen salystyra kelip, artyqshylyǵyn aıta ketýdi áste esten shyǵarmaıdy. «Qazir árnárseden bále izdeımiz de turamyz». Iá, Qabatovtyń «Shydamsyz qazaǵyndaǵy» sóz bul. «Qazir adamdar ekige bólindi. Kerek adam, kerek emes adam. Aqshasy azdaý týysqanyń, jumyssyz qalǵan klasstasyń t.b. Kerek adam degen jaǵdaıy bar adam. Ol adam kele jatsa anadaı jerden kútip turasyń. Ol adam kórmeı tursa aldynan shyǵasyń»,-degen syndy ázilderde ómirdiń shyndyǵy ashyq aıtylǵanymen, osyndaıda qazekemniń «bir qumalaq bir qaryn maıdy shiritedi» degeni oıǵa oralady. Osyny qazaqtar dep jalpylaı aıtýymyz qanshalyqty oryndy?
Sondaı-aq, «Qazaqtar» atty qoıylymynda: «Avtomobıl-arba, koka-kola-sorpa, debat-aıtys»,-dep birqatar sózdi tizbekteı jóneledi. Biz táýelsizdik alǵaly tórt qubylasy túp-túgel bolmasa da, el qatarly ómir súrip kele jatqan el emespiz be?! Jurt qatarly kólik minip, elmen birge sýyn da, sorpasyn da soraptap kele jatqan joqpyz ba?! Bárinen buryn qazaqtyń tól óneri aıtysty «debat» qylǵanymyz qalaı?! Bizde «debat» degende «pikirtalas, pikirsaıys» degen ádemi-aq sózderimiz bar emes pe?!
«Syrlasý» baǵdar-lamasyna kelgende Qabatov munysyn: «Keremet qazaqpyz ǵoı negizi. Men qazaq dese janyn beretin qazaqpyn. Halyqtyń arasynda júrgen qazaqpyn. Sosyn shyǵar, qazaq úıtpese eken, búıtpese eken, mynadaı el bolsaq eken dep turam. Meniń ázilderimniń maqsaty - halyqty tárbıeleý»,-dep túsindirip edi. Al bizdiń aıtpaǵymyz, «bolar eldiń balasy birin-biri batyr deıdi». Áste qazaqqa til tıgizbeńiz dep uryssaq ta, sóz arasynda ózgeler sıaqty artyqshylyǵymyzdy, basqa eldermen salystyrǵanda tektiligimizdiń de basymdyǵy baryn tilge tıek ete ketýdi umytpasa ıgi deımiz.
Bolmasa ózimizdi mazaq etip, ózimiz kúle bergenimiz ersi sıaqty. Sondyqtan sózimizdi keıipkerimiz aıtqandaı, «Jurtty kúldirsek te, elge kúlki bolmaıyq!»,-dep aıaqtaǵanymyz jón shyǵar...
