Reseı prezıdenti Vladımır Pýtınniń Ýkraına Reseı áskerin jiberý sheshimin aqtaý úshin keltirgen ýájderi "eshkimdi jańylystyrmaıdy" dep málimdedi keshe Vashıngtonda AQSH prezıdenti Barak Obama. Obamanyń aıtýynsha, "Reseıdiń Ýkraınaǵa basyp kirýi" Máskeýdiń kúshin kórsetpeıdi, ol tek Reseıdi basqa memleketterden alystatady. Ol buǵan qosa Máskeýdiń halyqaralyq qaýymdastyqqa Ýkraınadaǵy jaǵdaıdy retteýde kómek kórsetýge áli de múmkindigi baryn eskertti. Keshe Kıevke barǵan AQSH memlekettik hatshysy Djon Kerrı Reseıdiń áreketin "Ýkraınaǵa qarsy agresıa" dep ataǵan. Ol AQSH "Ýkraına halqymen birge ekenin" aıtyp, shıelenisti halyqaralyq qurylymdar arqyly retteýge múddeli ekenin bildirgen. Kıevte Ýkraınanyń jańa basshylyǵymen kezdesken Kerrı Vashıngtonnyń Kıevke bir mıllıard AQSH dollary kóleminde qarjylaı kómek berý nıeti baryn aıtty. AQSH pen batys elderi Reseıdiń Ýkraına terıtorıasynan áskerı bólimderin alyp ketýin talap etip, olaı bolmaǵan jaǵdaıda Máskeýge qarsy ekonomıkalyq sanksıalar salynyp, dıplomatıalyq oqshaýlanyp qalatynyn eskertken. Biraq Máskeý tek Qyrymdaǵy áskerin kúsheıtkenin ǵana aıtady.