سوعىستان قاشىپ، قازاقستانداعى تۋىستارىندا جان ساۋعالاعان سيريالىق وتباسى قاراعاندىدا ءساۋىردىڭ ورتاسىنا دەيىن قالاتىن بولدى، - دەپ حابارلايدى «قامشى» پورتالى «استانا» ارناسىنا سىلتەمە جاساپ.

جەرگىلىكتى كوشى-قون پوليسياسى قايىن جۇرتىن پانالاعان ياسەر الەزالدين مەن ونىڭ 5 بالاسىنا قازاق جەرىندە ۋاقىتشا تۇراقتاۋ مەرزىمىن تاعى ءۇش اپتاعا سوزعان. بۇل تۋرالى "استانا" تەلەارناسىنا سيريالىق ازاماتقا تۇرمىسقا شىققان ساندۋعاش رايسوۆانىڭ اپكەسى الماگۇل رايسوۆا ايتتى.  سيريالىق وتباسى وزدەرىنىڭ اتىس-شابىستان باس ساۋعالاعان «بوسقىن» ەكەندەرىن دالەلدەۋ ءۇشىن قالاداعى قازىبەك بي اۋداندىق سوتىنا شاعىمدانىپتى. ىسپەن قوعامدىق قورعاۋشىلار اينالىسپاق. داۋ-داماي شەشىلگەنشە سيريالىقتار قازاقستاننان قۋىلمايدى. سوندىقتان وبلىستىق كوشى-قون پوليسياسى وتباسىنىڭ ۋاقىتشا تۇراقتاۋ مەرزىمىن ۇزارتقان. 

الماگۇل رايسوۆا، ساندۋعاش رايسوۆانىڭ اپكەسى:

بۇل مەنىڭ كۇيەۋ بالام. وعان بوسقىن دارەجەسىن بەرەدى دەپ ۇمىتتەنەمىن. ءوزىنىڭ ەلىندە ءالى سوعىس ءجۇرىپ جاتىر. ءسىڭىلىمدى ول ەلگە جىبەرە المايمىن. بالالارى بار، ءالى كىشكەنتاي.

 ەسكە سالساق، قازاقستان ازاماتى ساندۋعاش رايسوۆا، وتباسىمەن بىلتىر تامىزدا سيرياداعى سوعىستان قاشىپ، قاراعاندىداعى تۋىستارىن پانالاعان. زاڭ بويىنشا قۋعىن-سۇرگىنگە ۇشىراماي، ءوز ەرىكتەرىمەن جەر اۋدارعاندىقتان، ونىڭ كۇيەۋى مەن بالالارىنا «بوسقىن» مارتەبەسى بەرىلمەيدى. ولاردىڭ ۆيزاسىنىڭ مەرزىمى ناۋرىزدىڭ 25-نە اياقتالۋى ءتيىس بولاتىن.