ەل پرەزيدەنتى نۇرسۇلتان نازاربايەۆ «اناعا اپارار جول»  ءفيلمىنىڭ استانادا وتكەن كورسەتىلىمىنە قاتىستى، - دەپ حابارلايدى baistars.kz «حابار» ارناسىنا سىلتەمە جاساپ.

كارتينانىڭ كورسەتىلىمى العىس ايتۋ كۇنىنە وراي ۇيىمداستىرىلعان. كورسەتىلىم الدىندا ەلباسى ءتۇسىرىلىم توبىمەن كەزدەسىپ، سۇحباتتاستى.

فيلم ومىردە ءتۇرلى قيىندىقتى باسىنان وتكەرگەن جىگىتتىڭ تاعدىرى جايىندا ءوربيدى. جاستايىنان ۇيىنەن كەتكەن كەيىپكەر سوعىستى كورىپ، تۇتقىندار لاگەرىنە تۇسەدى. وسى جىلدار بويى ول ۇيىنە، اناسىنا ورالىپ، ۇلىن كورەم دەگەن ءۇمىتىن جوعالتپايدى. كەيىپكەردىڭ 45 جىل ءومىرى ەكراندا ءوربيدى. سيۋجەت ۇجىمداستىرۋ، حالىققا قايعى اكەلگەن جۇتتى، ۇلى وتان سوعىسى مەن سوعىستان كەيىنگى قازاقستاننىڭ قيىن كەزەڭدەرىن قامتيدى.

«مينسكتە سوعىس كورىنىستەرىن تۇسىردىك. دنەپردى تەزدەتىپ ءوتۋ كورىنىسىن 10 كۇن تۇسىردىك. ارينە، تەحنيكالىق جاعىنان بۇل بىزگە ۇلكەن سىن بولدى. بۇل ەرەكشە جۇمىس بولدى، وتە سالماقتى جانە ءىرى جوبا. قولىمىزدان كەلدى دەپ ويلايمىن» — دەيدى فيلم رەجيسسەرى اقان ساتايەۆ.

ايتا كەتەيىك، ءفيلمنىڭ پروديۋسەرى – پرەزيدەنت نۇرسۇلتان نازاربايەۆتىڭ كەنجە قىزى ءاليا نازاربايەۆا. ال، باستى رولدەردى التىناي نوگەربەك، ءادىل احمەتوۆ، ارۋجان جازىلبەكوۆا جانە ەركەبۇلان دايىروۆ سىندى اكتەرلەر سومدايدى. سەنارييىن تيمۋر جاقسىلىقوۆ جازسا، مۋزىكاسىمەن رەنات گايسين اينالىسقان.