م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءى. ەسەنبەرليننىڭ 100 جىلدىعىنا وراي “الماس قىلىش” تاريحي دراماسى العاش رەت ساحنالانباق، - دەپ حابارلايدى «قامشى» پورتالى تەاتردىڭ باسپا ءسوز قىزمەتىنە سىلتەمە جاساپ.

كورنەكتى جازۋشى ءى.ەسەنبەرليننىڭ اتاقتى «الماس قىلىش» رومانى جەلىسىمەن قويىلعان سپەكتاكل قازاق ەلىنىڭ ىرگەتاسى قالانۋىن بەينەلەيدى. XV عاسىر ورتاسى. دەشتى-قىپشاق دالاسى. ءابىلحايىر حاندىعىنداعى تولاسسىز قان توگىس سوعىستار، ىشكى قىرقىستار مەن اياۋسىز ەزگىدەن حالىق اۋىر كۇيزەلىستە.  ال، حان ءوز تاعىن ساقتاپ قالۋ ءۇشىن قول استىنداعىلاردى بىر-بىرىنە ايداپ سالىپ وتىرادى.  وسىنداي الماعايىپ كەزەڭدە كەرەي مەن جانىبەك سۇلتاندار قازاق رۋلارىنىڭ باسىن قوسىپ بولەك ەل بولماققا بەكىنەدى. موعولستان حانى ەسەنبۇعامەن كەلىسىمگە كەلىپ، ازاتتىق اڭساعان قازاق رۋلارىن باستاپ باتىس جەتىسۋ جەرىندەگى شۋ مەن تالاس وڭىرىنە قونىس اۋدارادى. سپەكتاكل جەكە ءوز الدىنا حاندىق قۇرۋ جولىندا نەبىر تار جول، تايعاق كەشۋدەن ءوتىپ، ۇلى تاريح كوشىنەن ءوزىنىڭ لايىقتى ورنىن العان حالقىمىزدىڭ رۋح مىقتىلىعىن پاش ەتەدى.

«قويىلىمنىڭ رەجيسسەرى – ق ر ەڭبەك سىڭىرگەن قايراتكەرى الما كاكىشيەۆا، ساحنالىق نۇسقاسىنىڭ اۆتورى – ءانناس باعدات، قويۋشى-سۋرەتشىسى – مۇرات ساپاروۆ، كومپوزيتورى – ش.بازاركۋلوۆا»، - دەلىنگەن باسپا ءسوز قىزمەتى تاراتقان حابارلامادا.