اقپان ايىنىڭ سوڭعى كۇنىندە الماتى وبلىسى قاراساي اۋدانىنىڭ اۋماعىندا وبلىستىق ءىىد جول-پاترۋلدىك پوليسيا قىزمەتكەرى مەن جەرگىلىكتى كاسىپكەر اراسىندا تۋىنداعان كيكىلجىڭ پوليسەيدىڭ قارۋ قولدانۋىمەن اياقتالعان. ەڭ قىزىعى پوليسەي قىزمەتتىك كيىم ۇلگىسىندە ماس كۇيىندە زاڭ بۇزۋشىلىققا بارعان. اتالعان وقيعا تۋرالى ratel.kz سايتى ۆيدەوجازبا جاريالادى.

وندا 29 اقپان كۇنى الماتى وبلىسى جامبىل اۋدانى قانشەنگەلدى اۋدانىندا پاترۋلدىك قىزمەت اتقارعان پوليسەي قىزمەتتەن سوڭ كەشكى ساعات توعىزدار شاماسىندا «لادا-پريورا» ماركالى جەكە كولىگىمەن الماتى قالاسىنا قايتىپ كەلە جاتىپ، جول بويىندا قارسى باعىتتا كەلە جاتقان كولىكتى توقتاتقان. ول كولىكتىڭ جۇرگىزۋشىسى دە تەگىن ادام ەمەس، ارنايى ورگانداردىڭ، اتاپ ايتقاندا پرەزيدەنتتىڭ كۇزەت قىزمەتىنىڭ بۇرىنعى قىزمەتكەرى ەكەنى كەيىن بەلگىلى بولادى. كولىك جۇرگىزۋشىسى پوليسەيدىڭ ۇستىنەن ىشىمدىك ءيسى شىعىپ تۇرعانىن بايقاپ، ونىڭ كوزىنشە «102» نومىرىنە قوڭىراۋ شالادى. مۇنى كورگەن پوليسەي كولىگىنە وتىرىپ الىپ، قاشا جونەلەدى. بۇرىنعى «چەكيست» تە قاراپ قالماي، قاشقىن پوليسەيدىڭ ىزىنە ءتۇسىپ، بولعان جاعداي تۋرالى پوليسياعا تاعى ءبىر مارتە قوڭىراۋ شالادى. قاشقان پوليسەي الماتى قالاسى ناۋرىزباي اۋدانىنداعى جەكە ۇيلەردىڭ ءبىرىنىڭ الدىنا كەلىپ توقتاپ، قۋعىنشىعا قاراتا تابەلدىك قارۋدان بىرنەشە مارتە وق اتادى. مۇنىڭ بارلىعى ۆيدەودا انىق كورىنەدى.

ratel.kz سايتى الماتى وبلىسى ىىد-دەن اتالعان پوليسەيدىڭ ورەسكەل ارەكەتى تارتىپتىك كەڭەستە قارالعانى، تارتىپتىك كەڭەس شەشىمىمەن قىزمەتتەن شىعارىلعانى، سونداي-اق، ءىىد باسشىلىعى دا جاۋاپقا تارتىلعانى تۋرالى جاۋاپ العاندارىن ايتادى. الايدا، سايت رەداكسياسى دا، وبلىستىق ىىد-دە ءتۇن ىشىندە نەگىزسىز قارۋ قولدانعان پوليسەيدىڭ كىم ەكەنى تۋرالى ناقتى اقپارات تاراتپاعان.