جەمقورلىققا قارسى ءىس-قيمىل جونىندەگى ۇلتتىق بيۋرو قىزمەتكەرلەرى 4 ناۋرىز كۇنى ق ر ءىىم ەبك كوميتەتىنىڭ ەسىرتكى بيزنەسىمەن كۇرەس جونىندەگى وڭىرلىك باسقارماسىنىڭ بۇرىنعى باستىعى، پوليسيا پولكوۆنيگى سەرىك بەگاسىلوۆتى قاماۋعا الدى، - دەپ حابارلايدى «قامشى» پورتالى جەمقورلىققا قارسى ءىس-قيمىل جونىندەگى ۇلتتىق بيۋرونىڭ باسپا ءسوز قىزمەتىنە سىلتەمە جاساپ.

ول 2013 جىلدان بەرى ىزدەۋدە بولعان. الماتىدا جەزوكشەلەر قىزمەتىنە باسشىلىق جاساعانى ءۇشىن سوتتالعان «ماما روزا» - ولگا حامبۋلاتوۆا ىسىندە اتى اتالعان پولكوۆنيك الماتى جەزوكشەلەرىنىڭ قىزمەتىن 2011-2013 جىلدار ارالىعىندا ءوزى قورعاشتاپ كەلگەن دەپ ايىپتالعان ەدى.

«قىلمىستىق قۋدالاۋ ورگانىندا لاۋازىمدى تۇلعا بولا تۇرا س. بەگاسىلوۆ 2011-2013 جىلدار ارالىعىندا جەڭگەتايلىقپەن جانە جەزوكشەلىك قىزمەت كورسەتۋمەن اينالىساتىن قىلمىستىق توپ قۇرىپ، باسقارعان. س. بەگاسىلوۆ ۇزاق جىلدار قۇقىققورعاۋ ورگاندارىندا ءتۇرلى لاۋازىمداردا بولعاندىقتان جانە جەدەل-ىزدەستىرۋ قىزمەتىنىڭ قىر-سىرىن جەتىك بىلگەندىكتەن ءىز كەسۋشىلەردەن ۇزاق ۋاقىت جاسىرىنىپ كەلدى»، - دەلىنگەن ۇلتتىق بيۋرو تاراتقان حابارلامادا.

2013 جىلدان بەرى ىزدەۋدە جۇرگەن س. بەگاسىلوۆ ينتەرپول مالىمەتتەرى بويىنشا تۇركيا اۋماعىندا جاسىرىنىپ كەلگەن.

«2015 جىلى قازاقستان باس پروكۋراتۋراسى قاشقىن پولكوۆنيكتى ىزدەۋدى جەمقورلىققا قارسى قىزمەت ماماندارىنا تاپسىرعان بولاتىن. ءقازىر س. بەگاسىلوۆ ۇستالىپ، الماتىداعى تەرگەۋ يزولياتورىنا قامالدى»، - دەلىنگەن حابارالامادا.