قازاقستان پرەزيدەنتى نۇرسۇلتان نازاربايەۆ رەسەيگە ساپارىنىڭ قارساڭىندا، 10 ناۋرىزدا رەسەي پرەزيدەنتى ۆلاديمير پۋتينمەن تەلەفون ارقىلى سويلەستى.
پرەزيدەنتتىڭ رەسمي سايتىنىڭ حابارلاۋىنشا، نازاربايەۆ "قازاقستاننىڭ ستراتەگيالىق سەرىكتەس رەتىندە ۋكرايناداعى از ۇلتتار قۇقىعىن، سونداي-اق ءوزىنىڭ قاۋىپسىزدىگىنىڭ مۇددەسىن قورعايتىن رەسەيدىڭ ۇستانىمىنا تۇسىنىستىكپەن قارايتىنىن" اتاپ وتكەن.
قازاقستان پرەزيدەنتى "مۇددەلى قاتىسۋشىلار بايىپتىلىق تانىتاتىنىنا جانە كەلىسسوزدەر جولىمەن جاعدايدى تەزدەتىپ قالپىنا كەلتىرۋ شارالارىن قابىلدايتىنىنا ۇمىتتەنەتىنىن" بىلدىرگەن.
بۇعان دەيىن رەسەي پرەزيدەنتىنىڭ باسپا ءسوز قىزمەتى 11 ناۋرىزدا نازاربايەۆ ماسكەۋدە "حالىقارالىق ماڭىزدى ماسەلەلەردى" تالقىلاۋ ءۇشىن پۋتينمەن كەلىسسوزدەر وتكىزەدى دەپ حابارلاعان ەدى.
وتكەن اپتادا نۇرسۇلتان نازاربايەۆ، ۆلاديمير پۋتين جانە بەلارۋس پرەزيدەنتى الەكسەندر لۋكاشەنكو ماسكەۋدە كەدەن وداعىنا قاتىستى ماسەلەلەردى تالقىلاعان.
"ازاتتىق راديوسى"
