كەزەكتى كەڭەس-سايلاۋى ءوتتى. ءبارى دۇرىس. ماجىلىسشىلەردى مامىلەگە كەلتىرە الامىز، ويتكەنى، باسىمى نۇروتاندىقتار. ياكي، نۇر دا بار، وتان دا ەستەن شىققان جوق...

مەملەكەت باسشىسى، «نۇر وتان» پارتياسىنىڭ جەتەكشىسى قاتتى تولقۋ ۇستىندە بىلاي دەدى: «ءبىز جەڭىسكە جەتتىك. قازاقستاندىقتاردىڭ 77 پايىزى قاتىستى، بۇل – رەكورد. “نۇر وتان” سايلاۋشىلار داۋىسىنىڭ 82 پايىزىنا يە بولدى، بۇل – رەكورد. مەن بارلىق داۋىس بەرۋشىلەرگە ريزاشىلىعىمدى بىلدىرەمىن. ءبىزدىڭ پارتيامىزدىڭ ءاربىر مۇشەسى كورسەتىلگەن سەنىمدى باعالاۋى ءتيىس. بۇل جەڭىس – كوپجىلدىق جۇمىستىڭ ناتيجەسى. سايلاۋدى 800 شەتەلدىك جانە 10 مىڭعا تارتا جەرگىلىكتى بايقاۋشىلار باقىلادى، ولار سايلاۋ ۇدەرىسى زاڭناماعا سايكەس وتكەنىن اتاپ ءوتتى. ءبىز الەمدىك قوعامداستىق الدىندا اشىق ءارى ءادىل سايلاۋ وتكىزدىك...».

ءۇش ساياسي پارتيا: «نۇر وتان»، «اق جول» جانە كەشەگى قازاققا قىرعىن سالعان قىزىل كوممۋنيستەردىڭ (قكحپ) 7 پايىزدان جوعارى داۋىس جينادى. «نۇر وتان» پارتياسىنا 82،15؛ قازاقستاننىڭ «اق جول» دەموكراتيالىق پارتياسىنا 7،18؛ قازاقستان كوممۋنيستىك حالىق پارتياسىنا 7،14؛ «اۋىل» حالىقتىق-دەموكراتيالىق پارتيوتتىق پارتياسىنا 2؛ جالپىۇلتتىق سوسيال-دەموكراتيالىق پارتياعا 1،18؛ «بىرلىك» ساياسي پارتياسىنا 0،29، پايىز سايلاۋشىلاردىڭ داۋىسى بەرىلگەن...

اقجولدىقتار ءبىراز جالاۋلاتتى. ءوزىم ءباس تىگىپ، الاش­وردانىڭ ءىزباسارلارىنا ۇقساعىسى كەلگەن جىگىت­تەردى قولدادىم. قولدادىم دا، ماقالا جازدىم. پارتيانىڭ باسشىسى تۋرالى ايدىك اۆتوردىڭ ەتەكتەي بازىنا-ەسسەسىن قايتارا جاريالادىم. ءسوز جاردەمى بولسىن، دەم بەرسىن دەدىم. بىرەۋدەن بىردەڭە دامەتكەندىكتەن ەمەس، ءۇمىت ەتكەندىكتەن: زيالى قاۋىم مەن ىسكەر توپتىڭ قوسىندىسىن قوش كورىپ، وڭدى وزگەرىس، ويانعان بەتبۇرىسقا يەگىمىز قىشىعاندىقتان...

پەندە كوڭىلمەن «اقجولدىڭ» ساياسي بەلسەندى قوس جەتەكشىسىنىڭ ءبىرى التىن ۋاقىتىنىڭ تۇتامىن (بىر-ەكى ءمينوتىن) قيىپ، ءبىر اۋىز «راحمەتىن» ايتىپ، ىقىلاسىن بىلدىرەر دەپ دامەلەندىك. ويحوي، دامەمىز دالادا قالدى...

ال، قىزىل كوممۋنيستەردە مەنىڭ بابامنىڭ قايتپاس كەگى قالعان، قازاقتىڭ ءجۇز جىلعا ازايتقان ازعىنداردى كەشە الماسپىن...

سوسىن، اۋىلعا ۇقساس، بىرلىكتى كوكسەگەن ءبىرلى-جارىم پارتيالار دا قوتىر اتتارىن بايگەگە قوستى. ءوز باسىم تانىمايتىن، تالتۇستە اسپاننان تۇسكەندەي بولعاندارعا ۋاقىت شىعىن قىلمادىم...

وزىمە ۇنايتىن، بيلىكتەن اۋلاق قونعان، ءبىراق، ادامي كەلبەتى مەن يماني قاسيەتى مىعىم، ەلدىك پەن وتانشىلدىق بولمىسى بەكەم، بىلىم-بىلىگى تەرەڭ جالقى جىگىتتەر سايلاۋ الامانىنا تۇسپەگەن سوڭ، باسقا سالسا باسپاقشىل بولىپ، بەيتاراپ ءجۇردىم...

امالسىز ەۋروپا وركەنيەتىنىڭ قاعيداتتارىنا «تابىنعان» ەل بولعاسىن، سايلاۋ جاساپ، بايلاۋ قىلۋ كەرەك شىعار. مەن حالىقارالىق ءھام الەمدىك ساياسي سالانىڭ مامانى ەمەسپىن، ءبىراق، ءار سايلاۋ وتكەن سايىن مۇڭدى كۇيگە ءتۇسىپ، تۇيىق ويعا قالامىن: «ۇتىلعان كىم، ۇتقان كىم؟..» - دەپ...

ءاي، وسىنىڭ ءتۇيىنىن ەشكىم دە بىلمەيدى. ءتىپتى، بىلگىسى دە كەلمەيدى. «كەرەگى جوق باس قاتىرىپ» دەپ ويلايدى. كەرەك دەسەڭ «ماعان قاتىسى جوق» دەپ تە اداسادى. سوندا بىزگە قاتىسى بولماسا، نەسىنە ەرتە تۇرىپ، ەتىك كيدىك. ەتىك كيىپ، سايلاۋعا كيلىكتىك؟!.

كيلىگۋىمىزگە قاراعاندا، جاناما ەمەس، تىكەلەي قاتىسى بار، كەزكەلگەن سايلاۋدىڭ... ءاربىرىمىزدىڭ بۇگىنگى ءناپاقامىزعا عانا ەمەس، نەمەرەمىزدىڭ ەرتەڭگى تاعدىرىنا تا تارامدانىپ تۇر...

...ويانا الساق، وسىنى ويلانىپ كورەيىك...

قاجىمۇقان عابدوللا