الەۋمەتتىك جەلىلەردە تاراعان قىرعىزستان وپپوزيسيا سەركەلەرىنىڭ تەلەفونمەن اڭگىمەلەسۋلەرى قىرعىزستاننىڭ مەملەكەتتىك قاۋىپسىزدىك كوميتەتىنىڭ نازارىنا ىلىنگەن، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

قىرعىزستاننىڭ ارنايى قىزمەت وكىلدەرى سوت سانكسياسىمەن ەلدەگى ءبىرقاتار وپپوزيسيالىق ساياساتكەرلەردىڭ تەلەفونمەن اڭگىمەلەسۋلەرى تىڭدالعانىن، ولار قازىرگى تاڭدا قوزعالعان №082-16-0054 قىلمىستىق ءىستىڭ ءبىر بولىگى ەكەنىن حابارلاعان.

بۇعان دەيىن الەۋمەتتىك جەلىلەردە قىرعىزستان وپپوزيسيالىق قوزعالىسى جەتەكشىلەرىنىڭ ءبىرى قۇبانىشبەك قادىروۆتىڭ، جالال-اباد وبلىسىنىڭ بۇرىنعى باسشىسى بەكتۇر اسانوۆتىڭ جانە وپپوزيسيالىق بەلسەندى دۋلاتبەك تۇردىنالييەۆتىڭ اڭگىمەلەرى جازىلعان اۋديوفايلدار تارالعان بولاتىن.

ونداعى اڭگىمەدەن اتالعان تۇلعالاردىڭ تالاس وڭىرىندە باستالىپ، كەيىن بۇكىل قىرعىزستان اۋماعىنا تاراۋى ءتيىس جاپپاي تولقۋلار ازىرلەمەك بولعانىن ۇعۋعا بولادى. وسى تولقۋلار ناتيجەسىندە وپپوزيسيا سەركەلەرى بيلىكتى باسىپ الىپ، ۇكىمەت پەن پرەزيدەنتتى ەلدەن قۋماققا ارەكەتتەنگەن. قىرعىز ارنايى قىزمەتىنىڭ وكىلدەرى وپپوزيسيونەرلەر وسى ماقساتتا جاقتاستارى مەن قاجەتتى كولىكتەر ازىرلەپ، ەلگە اقشا تاراتقان كورىنەدى.

بۇعان دەيىن قىرعىز رەسپۋبليكاسىندا 2005 جىلدىڭ 11 ناۋرىزىندا جانە 2010 جىلدىڭ 7 ساۋىرىندە مەملەكەتتىك توڭكەرىس بولىپ، سول كەزدەگى مەملەكەت باسشىلارى اسقار اقايەۆ پەن قۇرمانبەك باكييەۆ ەلدى تاستاپ شىققان بولاتىن.