بۇگىندە ۆاشينگتونعا الەمنىڭ ءتۇرلى ەلدەرىنىڭ باسشىلارى اعىلۋدا، - دەپ حابارلايدى «قامشى» پورتالى.

31 ناۋرىز بەن 1 ءساۋىر كۇندەرى وندا الەمدىك يادرولىق قاۋىپسىزدىك جونىندەگى سامميت وتەدى. 2010 جىلدان بەرى ءتورتىنشى رەت وتكەلى وتىرعان انتيادرولىق باس قوسۋعا 52 ەلدىڭ دەلەگاسياسى قاتىسادى دەپ كۇتىلۋدە. سامميت جۇمىسىنان بولەك قاتىسۋشىلار جوعارى دەڭگەيدەگى ەكى جاقتى كەزدەسۋلەر وتكىزەدى.

وسى جەردە مىنا ءبىر جايتكە نازار اۋدارعان ءجون. نۇرسۇلتان نازاربايەۆتىڭ الدىندا عانا اقش-قا جەتكەن تۇركيا باسشىسى ەرەجەپ ەردوعاندى اق ءۇي تاراپىنان بىردە-بىر رەسمي تۇلعا كۇتىپ الۋعا بارمادى. ەردوعاننىڭ الدىنان تۇركيانىڭ سىرتقى ىستەر ءمينيسترى ءماۋلىت شاۋىش ۇلى شىقتى.

مەملەكەت باسشىلارىنىڭ پروتكولدارىنا ساي ءبىرىنشى باسشىنى قارسى الۋعا نەگىزىنەن كۇتىپ الۋشى ەلدىڭ باسشىسى نەمەسە ودان كەيىنگى ەكىنشى، ءۇشىنشى تۇلعالار، مەملەكەتتىك حاتشى، ياكي سىرتقى ىستەر ءمينيسترى، تىم بولماعاندا شەنەۋنىكتەر ىشىنەن تاعايىندالعان ارنايى وكىل باراتىنى بەلگىلى. وسىنى ەسكەرسەك، تۇركيا باسشىسىنىڭ اق ءۇي ءۇشىن «سەنىمدى سەرىكتەس» رەتىندەگى باعاسى تومەندەگەن بە دەگەن ويعا قالاسىز. بۇل كۇدىگىمىزدى ەردوعان توقتاعان قوناق ءۇي الدىندا انكارا ساياساتىنا نارازىلىق بىلدىرگەن اكسيا وتكىزگەنى تۋرالى حابارلار دا قويۋلاتا ءتۇستى.

بۇعان دەيىن اقش پرەزيدەنتى باراك وباما ەردوعاننىڭ مەريلەند شتاتىندا تۇركيا قاراجاتىنا سالىنعان مەشىتتىڭ اشىلۋ سالتاناتىنا شاقىرۋىن دا جاۋاپسىز قالدىرعان. ال، سامميت اياسىندا ەردوعان اقش تاراپىنان مەملەكەتتىك حاتشى دجون كەرريمەن عانا ەكى جاقتى كەزدەسۋ وتكىزەتىنى حابارلاندى.

ال، رەسەي فەدەراسياسى بۇل جولعى سامميتكە قاتىسۋدان مۇلدەم باس تارتىپ وتىر.

جالپى جيىنعا جوعارى بايىتىلعان ۋراندى قولدانۋدى ازايتۋ، يادرولىق ماتەريالداردى لاڭكەستەردەن قورعاۋ ماسەلەلەرى ءسوز بولادى دەلىنگەنمەن، سامميتكە قاتىسۋشىلار، ونىڭ ىشىندە، اقش، تۇركيا، ۋكراينا سىندى ەلدەردىڭ باسشىلارى گەوساياسي ماسەلەلەردى دە العا تارتارى انىق. كرەملدىڭ دە ءبىر مەملەكەت وتكىزەتىن جيىن عالامدىق پروبلەما يادرولىق قاۋىپسىزدىك ماسەلەسى ءۇشىن ايتارلىقتاي الاڭ ەمەس دەپ، بۇل سامميتتەن ات-تونىن الا قاشۋى دا سودان بولۋى مۇمكىن.