اقمولا وبلىسى، كالاچي اۋىلىندا دارىگەرلەرگە بەيمالىم، تۇسىنىكسىز دەرت بۇرىن ۋران ءوندىرەتىن شاحتانىڭ ماڭىندا ورنالاسقان اۋىل تۇرعىندارىن جايلاپ بارادى. وتكەن اپتادا، دارىگەرلەر «ەنسەفالوپاتيا» دەپ اتاپ جۇرگەن بەلگىسىز دەرتتىڭ بەلگىلەرى بار تاعى بەس ادام اۋرۋحاناعا جاتقىزىلدى. ونىڭ ناقتى دياگنوزى دا، سەبەبى دە، ەمى دە ءالى ناقتى انىقتالعان جوق. اتى دا بەلگىسىز، جۇرت ونى «ۇيقى اۋرۋى» دەپ اتاپ ءجۇر. ۇيقى اۋرۋىنا شالدىققانداردىڭ سانى بۇگىندە قىرىقتى شامالاپ قالدى. كالاچي اۋىلىنىڭ تۇرعىندارى بىلتىرعى كوكتەمدە جاپپاي مەديسينالىق تەكسەرۋدەن وتكىزىلگەن، ۇيقى اۋرۋىنىڭ بەلگىلەرى تۇرعىنداردىڭ بارلىعىنان دەرلىك بايقالعان.
بەلگىسىز دەرتكە بايلانىستى پارلامەنت دەپۋتتاتتارى دا ءۇن قاتتى. پارلامەنت دەپۋتاتى ايقىن قوڭىروۆ ءوزىنىڭ سول ايماقتا تۋىپ-وسكەنىن ايتا كەلىپ، بۇل دەرتتىڭ اۋماقتىڭ تابيعاتىمەن تىعىز بايلانىستى ەكەنىن العا تارتتى. دەرتتىڭ سەبەبىن انىقتاي الماعان سوڭ، ەندىگى رەتتە رەسەيدەن دە ارنايى ماماندار شاقىرىلعان كورىنەدى. دەپۋتات مىرزانىڭ ايتۋىنا قاراعاندا، اقمولا وبلىسىنىڭ تەرريتورياسىندا رادون كەنى بار، سول توڭىرەكتەگى باسقا ەلەمەنتتەرمەن ارالاسۋى ناتيجەسىندە تۇرعىندارعا اسەر ەتكەن.
ال، پارلامەنتتىڭ "اقجول" فراكسياسىنىڭ باسشىسى ازات پەرۋاشيەۆ بۇل ماسەلەگە تەز ارادا شەتەلدىك مامانداردى شاقىرۋ كەرەكتىگىن ايتادى. "ءبىزدىڭ ەلدە مۇنداي ۇلكەن جاۋاپكەرشىلىكتى موينىنا الاتىن ەشكىم جوق. بۇل ەپيدەمياعا اينالىپ بارا جاتقان كۇردەلى ماسەلە"، - دەدى كوشباسشى.
ەڭ قىزىعى، توتەنشە جاعداي ءمينيسترى ۆ.بوجكو بۇل ونىڭ قۇزىرىندا ەمەستىگىن كەسىپ ايتتى: "بۇل مەنىڭ پروبلەمام ەمەس، دەنساۋلىق ساقتاۋ مينيسترلىگىنە ايتىڭىزدار! بىرەۋ ورتەنىپ، سۋعا باتىپ، بولماسا نايزاعاي ءتۇسىپ جاتسا، ماعان ايتساڭىزدار بولادى،" - دەپ ات -تونىن الا قاشتى.
دەنساۋلىق ساقتاۋ ميءنيسترى ساليدات قايىربەكوۆانىڭ پىكىرىنشە، كالاچي اۋىلىنىڭ تۇرعىندارى شالدىققان ەنسەفالوپاتيا اۋرۋىنىڭ بەلگىلەرى بۇل جەردەگى ەپيدەميولوگيالىق جاعدايمەن بايلانىستى ەمەس دەپ وتىر.
بيلىكتەگىلەردىڭ بەلگىسىز اۋرۋ تۋرالى پىكىرى وسىنداي. اۋرۋدىڭ سەبەبى مەن سالدارى، ەمى تۋرالى ناقتى اقپارات ءالى جوق. اۋرۋدىڭ تارالعانىن توقساننان استام ۋاقىت ءوتتى. سوندا، كالاچيدە قىرىلعالى جاتقان قىرىق ادامنىڭ تاعدىرىنا كىم جاۋاپتى؟
