جەكسەنبى كۇنى ۋكراينادا قازاقستانعا باعىت العان «كاماز» اۆتوموبيلدەرىنىڭ ءىرى پارتياسىن قارۋلانعان ءبىر توپ ادام باسىپ الدى، دەپ حابارلادى "قازاقپارات" «كاماز» ااق باسپا ءسوز قىزمەتىنە سىلتەمە جاساپ. «سوڭعى ەكى ايدا ساتىلماعاندىقتان، قاجەتتى اينالىمدى قامتاماسىز ەتۋ ماقساتىندا جانە دەبيتورلىق بورىشتى قايتارۋ ءۇشىن بەيسەنبى كۇنى، 13 ناۋرىزدا چەرنيگوۆ (ۋكراينا) قالاسىنداعى ءبىزدىڭ ساۋدا كومپانيامىزدىڭ قويماسىنان 50 ءاۆتوموبيلدى استانا قالاسىنداعى كومپانيامىزعا جىبەرۋ تۋرالى شەشىم قابىلداندى»، - دەپ جازىلعان حابارلامادا. تاراتىلعان مالىمەتتەرگە قاراعاندا، جۇما كۇنى 14 ناۋرىزدا ءتيىستى كەلىسىمشارتقا قول قويىلىپ، چەرنيگوۆ قالاسىنداعى كەدەندە كولىكتەردى تيىسىنشە راسىمدەدى. سەنبى كۇنى سەنكوۆكا اۋىلىنداعى شەكارا وتكەلىنە 36 كاماز ءاۆتوموبيلى جەتكىزىلدى. ولار «تيتان» كۇزەت مەكەمەسىنىڭ قارۋلانعان ءتورت كۇزەتشىسىنىڭ قاراۋىندا تۇراقتا قالدىرىلدى. كولىكتىڭ قالعانى بۇل جەرگە جەكسەنبى كۇنى تاڭەرتەڭ جەتكىزىلۋى ءتيىس ەدى. كەيىن بارلىق پارتيا نابەرەجنىە چەلنى قالاسىنان كەلە جاتقان جۇرگىزۋشىلەرگە تاپسىرىلىپ، رەسەيدە كۇتىپ تۇرعاندارعا جەتكىزىلىپ، كەيىن قازاقستانعا جونەلتۋ جوسپارلانعان. الايدا سوڭعى كولونناداعى 7 كولىكتى چەرنيگوۆ قالاسىنان شىعارۋعا وزدەرىن مايداننىڭ جاۋىنگەرلەرى دەپ تانىستىرعان قارۋلانعان ءبىر توپ ادام (شامامەن 10 ادام) كەدەرگى كەلتىردى. قۇجاتتاردى سۇراعان ولارعا تاۋاردىڭ قازاقستانعا ەكسپورتتالاتىنىن راستايتىن دەكلاراسيا كورسەتىلدى. كۇزەت وقيعا ورنىنا ميليسيا جانە گاي وكىلدەرىن شاقىردى. بەلگىسىز بىرەۋلەر دە كومەككە 2 دجيپپەن كەلگەن قارۋلانعان ادامداردى شاقىردى. ولاردىڭ سوزىنە قاراعاندا دجيپتەردەگى ادامدار دا كييەۆ وكىلدەرى. كولوننا العا قاراي قوزعالسا، وق جاۋدىراتىنىن ايتىپ قورقىتقان دەپ جازىلدى حابارلامادا. «رەسەي قىرىمداعى ءبىزدىڭ مەنشىگىمىزدى يەلەنۋدە، ال ءبىز ولاردىڭ كولىكتەرىن الامىز»، - دەپ كەلتىردى بەلگىسىزدەردىڭ ءسوزىن كومپانيانىڭ باسپا ءسوز قىزمەتى. مەملەكەتتىك مەنشىككە جاتپايتىن كولىكتەر قازاقستانعا جەتكىزىلەتىنى تۋرالى سوزدەردى ولار ەلەمەدى. ميليسيا قىزمەتكەرلەرى دە، گاي وكىلدەرى دە قارۋلانعان ادامداردان قورعاي المادى. ناتيجەسىندە 7 كولىك بەلگىسىزدەردىڭ باقىلاۋىمەن چەرنيگوۆ قالاسىنداعى قويماعا قايتارىلدى. حابارلاماداعى اقپاراتقا سايكەس، كەشكە تامان شەكارا وتكەلىندە تۇرعان تاعى 43 ءاۆتوموبيلدى دە 60 شاقتى قارۋلانعان ادام باسىپ العانى تۋرالى حابار كەلىپ تۇسكەن.